Чиныг рауаддзысты президенты гранты фæрцы
Цæгат Ирыстоны мыхуыры рацæузæн «Ирыстоны драматургийы антологи». Чиныг рауаддзысты президенты гранты фæрцы. Йæ бæрц у 625 мин сомы. Проект æххæст кæнгæйæ, нысан кæнынц алы дугты ирыстойнаг драматургты уацмыстæ иу альманахы æрæмбырд кæнын. Райдай ацы жанры бындурæвæрджытæй – Брытъиаты Елбыздыхъойæ æмæ Кочысаты Розæйæ, стæй нырыккон автортæй фæуы. Проектмæ гæсгæ, уацмыстæ бакæсæн уыдзæн гæххæттын хуызы, стæй ма нымæцон хуызы. Уымæй дарддæр ма фадат уыдзæн QR-кодтæй пайда кæнгæйæ интернет-ресурстæм бацæуынæн дæр. Ацы проекты сæйраг нысан у национ классикон драматургияйы рæзтыл кусын æмæ йын æххуыс кæнын. Проекты авторы ныхæстæм гæсгæ Ирыстоны нырыккон театртæн хъæуы сæ репертуар парахатдæр кæнын. Уыимæ – ирон авторты ирон æвзагыл фыст пьесæты фæрцы. Ирыстоны драматургийы антологи та тынг баххуыс кæндзæн ацы фарста алыг кæнынæн. Нæ республикæйы ныртæккæ ис 7 театры. Антологи та йæ сæйраг хæстæ æххæст кæнгæйæ, зынгæ фæхъæздыгдæр кæндзæн се вæрæнтæ.
