Афтæмæй ацы аз медикты æххуыс бацагуырдтой 1500 адæймаджы
Мидхъуыддæгты министр Владимир Колокольцевы хъуыдымæ гæсгæ, бæстæйы регионты хъæуы æвронггæнæнты системæ сног кæнын. Уый тыххæй загъта Федерацийы Советы хицауадон сахаты. Ахæм уагдæттæ ныридæгæн архайынц цалдæр регионы. Цæгат Ирыстоны кусы наркологон диспансер. Йæ специалисттæ æрвылбон æххуыс кæнынц, карз нозтыл фыдахуыр чи сси, уыцы адæмæн. Бæлвырддæр хабæрттæ радзурдзæн Хъайтмазты Дзерассæ.
Наркологон диспансеры пациенттæй сæ фылдæр бирæ азты архайынц ацы æвзæр хъуыддаг ныууадзыныл. Интенсивон терапияйы хайадмæ æрвылбон бахауынц карз нозтæй хъæстæ адæм. Ам ис 30 бынаты.
Наркодиспансеры, карз нозтæй хъæстæ чи фæцис, уыцы адæмæн кæнынц æххæст медицинон æххуыс. Специалисттæ æххуыс кæнынц, ацы хъуыддаджы фæстиуджытæ аиуварс кæнынæн.
Хайады ис хъæугæ кусæнгæрзтæ. Цæттæ у медицинон персонал дæр. Пациенттæн æрвылбон кæнынц психологон æххуыс дæр. Специалисттæ куыд зæгъынц, афтæмæй адæмæн сæхи бон ацы фыдахуыр ныууадзын нæу.
Алкоголизм æмæ наркомани сты иугæндзон низтæ. Æнæ специалистты æххуысæй сæ сдзæбæх кæнын нæй. 2021-æм азы 1-æм январæй Уæрæсейы сног кодтой æвронггæнæнты системæ. Архайынц фидæн бындурыл, регионтæ сæхæдæг фидар кæнынц тарифтæ, ахæм уагдæттæм чи бахауы, уыдонæн. Фæлæ æвронггæнæнтæ бæстæйы се ппæт субъектты нæ байгом кодтой. Паддзахадон Думæйы бахастой, дзæбæхгæнæн-фæллойадон профилакторитæ сног кæныны фæндон. Уым алы пациент дæр хъуамæ æнæмæнг ацæуа дзæбæх кæныны æххæст курс. Афтæмæй алкоголизмимæ тох ахадгæдæр уыдзæн.
Специалисттæ куыд зæгъынц, афтæмæй ацы аз медикты æххуыс бацагуырдтой мин 500 адæймаджы. Наркологон диспансеры æххуыс кæнынц карз нозтыл фыдахуырæй суæгъд уæвыны хъуыддаджы. Фæлæ, дохтырты ныхæстæм гæсгæ, сæйрагдæр у, чи фæцудыдта, уыдоны царды раст фæндагыл слæууын кæнын. Уый та у æппæтæй зындæр.
