Æрмæст хъуамæ се ппæты дæр æххæст кæной æдасдзинады домæнтæ
Цæгат Ирыстоны ногæй скуыстой сывæллæтты ирхæфсæн центртæ æмæ кинотеатртæ. Æрмæст хъуамæ се ппæты дæр æххæст кæной æдасдзинады домæнтæ. Маскæтæ дарынæй уæлдай ма хъæуы алы ран дæр социалон дистанци æххæст кæнын.
Пандемияйы рæстæг кинотеатртæ нæ куыстой, æмæ сæм æфтиаг нал цыди. Ныртæккæ та алы кары адæмæн фадат ис ногæй кинотæм стыр экраныл кæсынæн, æрмæст санитарон домæнтæ æххæст кæнгæйæ. Ома æнæмæнг хъæуы маскæтæ дарын. Уымæй дарддæр социалон дистанци æххæст кæнын хъæуы канд бахизæнты æмæ фойейы нæ, фæлæ ма кинозалты дæр. Билеттæ æлхæнгæйæ, нымад цæуы афтæ, цæмæй дыууæ сыхаг креслойы хауой иу адæймагмæ. Уыцы домæн нæ хауы æрмæст æнæхъæн бинонтæй куы рбацæуынц, уæд. Уыимæ адæмы залмæ бауадзынц, сеансмæ ма фынддæс минуты куы фæхъæуы, уæд.
Коронавирусы инфекци хæсджытæ вæййынц сывæллæттæ дæр. Уымæ гæсгæ ирхæфсæн центрты æдасдзинады мадзæлттæ æххæст кæнын хъæуы æнæмæнг. Ныййарджытæм сæ бон бацæуын вæййы маскæты, сывæллæттæн та æвæстиатæй сбарынц сæ тæвд, æмæ дезинфекци скæнынц сæ къухтæн.
Сывæллæттæ кæм фæхъазынц, уыцы бæстыхæйттæн дæр скæнынц дезинфекци. Ирхæфсæн центрты администрацитæй уæлдай бæрнондæрæй домынц æппæт мадзæлттæ æххæст кæнын, цæмæй низ парахат кæнын ма уадзой, уый тыххæй.
Клубты, кинотеатрты, сывæллæтты ирхæфсæн центрты уæлдай хатт адæмы зæрдыл лæууын кæнынц, куыд ахсджиаг у профилактикон мадзæлттæ æххæст кæнын. Уымæн æмæ æрмæст афтæмæй ис хи низæй бахизын, æмæ æнæниздзинад фидар кæнын.
