Сæ куыстытæ йæм бацæттæ кодтой Цæгат Кавказы æппæт регионтæй 45 мастеры
Цæгат Ирыстоны нывгæнджыты Цæдисы залы байгом регионты хсæн аивадон равдыст. Сæ куыстытæ йæм бацæттæ кодтой Цæгат Кавказы æппæт регионтæй 45 мастеры. Æдæппæтæй дзы фенæн ис 150 куклайы. Алы экспонат дæр конд у хицæн техникæйы. Æрмдæснытæ пайда кодтой бæмбæгæй, полимерон пластикæй, æлыгæй, сæракæй, алыхуызон хъуымæцтæй, фарфорæй æмæ афтæ дарддæр. Экспозици баст у куклатæ аразджыты Æппæтадæмон бонимæ. Ахæм равдыст арæзт цæуы 5-æм аз. Аив æмæ зæрдæмæдзæугæ куклатæ фенæн уыдзæн мæйы кæронмæ. Фидараты Маринæ радзурдзæн бæлвырддæр.
Зындгонд аргъау «Щелкунчик»-æй паддзах кæд æппæрццæг хъайтар у, уæддæр ам никæйы фæтæрсын кæндзæн. Уый нæ, фæлæ ма йæм адæймаг раст кæсынæй не фсæды. Ацы авторон куклатæ сарæзта Наталья Бровицкая Мæздæгæй. Аивадон куклайы фестивалы архайы дыккаг хатт. Йæхи стенды ис 17 куысты. Уыдонæй сæйрагдæртæй иу у – ацы азы символ тигр. Кæй зæгъын æй хъæуы – Натальяйæн йæхи къухтæй конд.
Экспонатты хсæн ис æлыгæй конд, керамикон, къуымбил æндахæй быд æмæ хъуымæцтæй хуыд. Диисæгтæ аразджыты къухтæй рацыд раст удæгас персонажтæ. Экспозицийы ис 150 ирд сурæты, æмæ сæ алкæцыдæр у хицæн ныхасы аккаг, стæй сæ сфæлхат кæнæн дæр нæй. Сæйрагдæр хъуыды – национ стиль бахъахъхъæнын. Уый ирдæй зыны, Сырдонимæ баст куклаты серийы. Экспозицийы ахсы сæйраг бынæттæй иу. Таутиаты Азæ радвыста йæхи хъайтары Нарты кадджытæй. Уыимæ сери кæндзæн хъæздыгдæр. Уæвгæ, национ уæлдæрасæ ам сты канд адæм нæ, фæлæ цæрæгойтæ дæр.
Æрмдæсныйады 45 мастеры Цæгат Кавказы æппæт регионтæй бацæттæ кодтой сæ ахсджиагдæр куыстытæ равдыстмæ. Йæ байгом кæныны кадджын мадзалы алы авторы дæр схорзæхджын кодтой кады гæххæттытæй æмæ арфæйы ныхæстæй. Равдыст саразыныл бакуыста æхсæнадон змæлд «Иудзинад».
Куклатæ аразыны аивад бахъахъхъæнын æмæ йæ райрæзтыл кусын у равдысты сæйраг хæс. Цæгат Кавказы æрмдæсныты куклаты экспозици фенæн уыдзæн ацы мæйы кæронмæ.
