Актертæ куыд зæгъынц, уымæ гæсгæ уыдзæн уæлдай цымыдисагдæр
Цæгат Ирыстоны паддзахадон академион театр цæттæ кæны йæ ног сезонмæ. Актертæ куыд зæгъынц, уымæ гæсгæ уыдзæн уæлдай цымыдисагдæр. Бакуыстой хъæздыг репертуарыл, цæмæй театрдзауыл сæмбæлой æмбæлгæ хуызы. Ацы бонты актертæ фæскулисты кæнынц æмызмæлд. Абон театр йæ дуæрттæ уæрæх байгом кæндзæн республикæйы цæрджытæн æмæ уазджытæн. Генералон репетици бабæрæг кодта Тъехты Элинæ, æмæ йын ныхасы бар.
Абон 88-æм театралон сезон байгом кæндзысты Шекспиры трагеди «Паддзах Лир»-æй. Режиссеры хъуыдымæ гæсгæ, дунейæн зонгæ цы пьесæ у, уый ргом кæны 20-æм æнусы 90-æм азтæ. Шекспиры трагеди Ирон театры сценæйы фыццаг хатт куы сæвæрдтой, уæд дзы сæйраг хъайтары сурæт сарæзта Тæбæхсæуты Бало йæхæдæг. Уый фæстæ та – Уататы Бибо. Авторы хъуыды раргом кæнын у алы актеры хæс. Æмæ цас зындæр сурæт уа актерæн, уыйас фылдæр рæздзæн йæ дæсныйады – зæгъы ирон театры актер Айларты Асæхмæт.
«Паддзах Лир» æрмæст иронау не сдзырдта, фæлæ февзæрд æндæр дуджы дæр. Пьесæ цы æнусы фыст уыд, уый нæ хынцгæйæ, ахадгæ у абон дæр – зæгъы ирон театры актер Сугъаты Хъазыбег. Кенты сурæт равдисын ын зын нæу, уымæн æмæ сæ миддунетæ бирæ цæмæйдæрты сты иу хуызон.
Равдысты режиссер Уалыты Гивийы фæндыд англисаг пьесæйы руаджы равдисын, Советон Цæдис куыд фехæлд, уый. Æмæ «Паддзах Лир»-ы премьерæмæ йæ рæстæджы, цас адæм æрбацыд, уый дзурæг у, режиссерæн йæ къухы йæ хъуыды кæй бафтыд, ууыл. Æмæ та ныр дæр, ног театралон сезон байгом кæндзысты ацы пьесæйæ
Адæмы æнкъарæнтæ баст сты уæззау цаутимæ. Алы деталь дæр Шекспиры трагедийы аразы ирд ныв. Уæлдай ахсджиаг та у, уыцы ныв ныр иронау кæй у, уый. Абон та ирон театр радон хатт йæ дуæрттæ æхсызгонæй уæрæх байгом кæндзæн йæ театрдзауæн.
