Кадрты фарста у сæйрагдæртæй иу институт æмæ университет баиу кæныны хъуыддаджы
Цæгат Ирыстоны паддзахадон педагогон институты ахуыргæнджыты хыгъд нæ фæкъаддæр уыдзæн. Уый тыххæй пресс-конференцийы рæстæг фехъусын кодта республикæйы сæргълæууæджы уынаффæгæнæг æмæ ЦИПУ-йы ректор. Огъуаты Алан куыд фæнысан кодта, афтæмæй кадрты фарста у сæйрагдæртæй иу институт æмæ университет баиу кæныны хъуыддаджы. Алы ахуыргæнæгæн дæр уыдзæни куыст. Кæд университеты нæ, уæддæр æндæр ахуыргæнæндоны. Институт æмæ университет баиу кæныны нысан у, уæлдæр педагогон ахуырады хæрзхъæддзинад фæхуыздæр кæнын. ЦИПУ-йы педагогон факультет фæуæрæхдæр кæныны фæрцы дзы фылдæр фæзындзæн ахуырадзауты æмæ специализацийы хуызтæ дæр. Уыцы рæстæг, педагогон колледж та баззайдзæн хицæн ахуыргæнæндонæй. Пресс-конференцийы ныхас цыди физикон-математикон ахуырады рæзтыл дæр.
