Нымад у республикæйы сæйраг æмæ ахуырадон центрыл
Цæгат Ирыстоны паддзахадон университет бацыд Цæгат Кавказы 3 хуыздæр уæлдæр ахуыргæнæндоны хыгъдмæ. Нымад у республикæйы сæйраг æмæ ахуырадон центрыл. Æнусæй фылдæр историмæ уырдыгæй рацыд дæсгай мин студенттæ, абон та дзы ахуыр кæнынц алы бæстæты минæвæрттæ, архайынц дунейы æмвæзады чырæгты технологиты лаборатори æмæ компетенциты центр. Хуыздæр ахуыргæнæндоны ном райсыныл архайдтой 290 университеты бæстæйы 78 регионæй. Бæлвырддæр радзурдзæн Хъайтмазты Дзерассæ.
100 азæй фылдæр истори, дæсгай мин рауагъдонтæ æмæ республикæйы сæйраг наукон центры ном. Хетæгкаты Къостайы номыл Цæгат Ирыстоны паддзахадон университет регионы ахуырадон къабазы ахсджиаг бынат ахсы. Ардæм æрвылаз ахуыр кæнынмæ бацæуы мингай лæппутæ æмæ чызджытæ æрмæст республикæйæ нæ, фæлæ бæстæйы æмæ дунейы алы къуымтæй. Ныртæккæ университеты ис 7 мин студентæй фылдæр.
Цæгат Ирыстоны паддзахадон университеты ис 13 факультеты æмæ 46 кафедрæйы алы къабæзтæм гæсгæ: стоматологийæ актеры аивады онг. Кæд студентæн наукæ у цымыдисаг, уæд æнæмæнг ам у йæ бынат, уымæн æмæ университет стыр æргом здахы наукон-иртасæн куыстмæ. Ахуырдзаутæ арæх фæархайынц алыхуызон наукон мадзæлтты, бакусынц проекттыл æмæ азæй-азмæ æнтыстджындæрæй равдисынц сæхи æмæ сæ университет.
Университеты архайы фæсивæдон политикæйы æмæ социалон фарстаты фæдыл управлени. Хауы йæм цалдæр къабазы. Фæсивæдон политикæйы хайад дзуапп дæтты сфæлдыстадон, спортивон, патриотон æмæ концертон мадзæлттæн. Йæ бæрны ис 3 иугонды: студентты профцæдисон организаци, спортивон клуб æмæ студентон медиацентр.
Ахсджиаг куыст кæны социалон политикæйы хайад дæр. Æххуыс кæны йе нæниздзинад хъыгдард кæмæн у, уыцы студенттæн. Ноджыдæр ма иу къабаз та баст у, университеты рауагъдонтæн куысты бынæттæ агурынимæ æмæ конкуренцийы гæнæнтæ бæрзонддæр кæнынимæ. Уый тыххæй кусы «Карьерæйы центр». Сæрмагонд æргом ам здахынц педагогон архайдмæ.
Сæрмагондæй ахæм активон архайды фæрцы университет равдыста зынгæ прогресс. Бацахста æртыккаг бынат Цæгат Кавказы федералон зылды ахуыргæнæндæтты локалон рейтингы. Бацæттæ йæ кодта агентад RAEX. Хуыздæры ном райсыныл архайдтой 290 университеты бæстæйы 78 регионæй. Агентады эксперттæ уæлдæр ахуыргæнæндæтты архайдæн аргъ кодтой сæйраг критеритæм гæсгæ.
Ахæм æнтыстдзинæдтæй республикæйы рагондæр уæлдæр ахуыргæнæндон æрмæст йæ бæрзонд статус нæ фидардæр кæны, фæлæ фыссы ирон ахуырады историйы ног сыф.
