Уый тыххæй Уырыссаг географион æхсæнады регионалон хайады æмбырды радзырдта организацийы сæрдар Огъуаты Алан
Географийæ иумæйаг паддзахадон фæлварæн суыдзæн æнæмæнг дæтгæ, Цæгат Ирыстоны паддзахадон университеты «Экономикæ»-йы æмæ «Туризмы» къабæзты ахуыр кæнын кæй бафæнда, уыцы абитуриенттæн. Раздæр ахæм фæлварæн лæвæрдтой, географийы æмæ геоэкологийы факультетмæ чи цыди, ахæм фæсивæд. Уый тыххæй Уырыссаг географион æхсæнады регионалон хайады æмбырды радзырдта организацийы сæрдар Огъуаты Алан. Æмбырды хатдзæгтæ скодтой фæстаг 3 азы куыстæн. Цæгат Ирыстоны паддзахадон университет хаст æрцыд 10 хуыздæр уæлдæр ахуыргæнæндоны хыгъдмæ. Нæ республикæйы фыццаг райдыдта бырæттæ хицæнæй æмбырд кæнын. Æхсæнадон змæлд «Сансара»-йы активисттæ скъолаты аразынц экологон уроктæ. Уæвгæ, Цæгат Ирыстон сси Уæрæсейы фыццаг субъект, йæ цæрджытæн чингуыты «Сызгъæрин фонды» æрмæджытæ феныны фадат кæм фæци, ахæм. Огъуаты Алан ма радзырдта ног проектты тыххæй дæр. Ацы аз арæзт æрцæудзæн географийы ахуыргæнджыты конкурс. Призты фонд уыдзæн 100 мин сомы. Уæрæсейы Географион æхсæнады пензæйаг хайадимæ иумæ арæзт æрцæудзæн этнографион экспедици «Современный этномир. Горизонты Кавказа». Нысан ма кæнынц сæрмагонд конкурсы бацархайын дæр.
