Буаргъæд æххуыс кæны доныл экологон катастрофæты фæстиуджытæ иуварс кæныны хъуыддаджы
Цæгат Ирыстоны паддзахадон университеты ахуыргæндтæ бакуыстой сæрмагонд катализатор скæныныл. Буаргъæд æххуыс кæны доныл экологон катастрофæты фæстиуджытæ иуварс кæныны хъуыддаджы. Тайын кæны нефты продукттæ æмæ пластик. Ныртæккæ ахæм ногдзинад, зæгъæн ис, æмæ йæ рæстæгыл у. Специалисттæ куыд зæгъынц, афтæмæй йæ фæрцы Сау денджызы бæллæхы фæстиуджытæ аиуварс кæнынæн бахъæудзæн дæсгай азтæ нæ, фæлæ æрмæст 6 мæйы. Бæлвырддæр радзурдзæн Хъайтмазты Дзерассæ.
Ацы чысыл авгы стыр экологон фарста – Сау денджызы катастрофæ – алыг кæнынæн фæрæз. Фыццаг бакастæй, нæзынгæ ссадæг у æнæзианхæссæг катализатор. Йæ бон у нефты продукттæ æмæ пластмассæ батайын кæнын. Ахæм катализатортæн сæ фылдæры бындуры ис зынаргъ металлтæ, уымæ гæсгæ сын ис тынг бæрзонд аргъ. Цæгат Ирыстоны паддзахадон университеты ахуыргæндтæ скодтой хи аналог. Ахæм ахадгæ химикон буаргъæд, фæлæ цалдæр хатты асламдæр.
Магкоты Тамерлан йе *мкусджытимæ ахæм хатдзæгтæм иу бонмæ не *рцыд. Ахуыргæндтæ технологийыл куыстой 20 азы бæрц.
Специалисттæ æвдисынц катализаторы куыст. Чысыл рæстæгмæ мазут аивта йæ хуыз. Цæмæй æххæстæй рухсдзыд суа, уый тыххæй бахъæудзæн 300 сахаты бæрц. Йæ аргъмæ æмæ йæ æууæлты комплексмæ гæсгæ катализаторæн дунейы аналогтæ нæй. Йæ бон у æрдзæн хаст зиан скуынæг кæнын, æмæ уымæн афтæ бирæ рæстæг нæ бахъæудзæн.
Катализаторæй Сау денджызы спайда кæныны курдиатимæ университет фæсидт Уæрæсейы Федерацийы Хицауадмæ. Кæд разыйы дзуапп радтой, уæд экологон катастрофæйы фæстиуаджытæ аиварс кæнын бантысдзæн дæсгай азтæм нæ, фæлæ æппынфылдæр 6 мæймæ.
