Дзуапдæттæн мадзалмæ равзæрстой постановкæтæ «Цигантæ» æмæ «Нарт Сослан», нарты кадджыты мотивтæм гæсгæ
Цæгат Ирыстоны паддзахадон университеты аивæдты факультеты театралон хайады студенттæ бацæттæ кодтой сæ рауагъдон спектакль. Дзуапдæттæн мадзалмæ равзæрстой постановкæтæ «Цигантæ» æмæ «Нарт Сослан», нарты кадджыты мотивтæм гæсгæ. Пластикон спектакль «Цигантæ» æвæрд æрцыд Александр Пушкины поэмæмæ гæсгæ. Дзурæг у уарзондзинадыл, зæрдæхсайдыл, стæй дыууæ дунейы ныхмæлæуддзинадыл. Студенттæ уыцы хæс сæххæст кодтой иттæг хорз. Дзырдтой кафты æмæ поэзийы æвзагæй. Пластикæ æвæрдтой хореографтæ Гуцаты Тамерлан æмæ Хъулаты Аланæ. Спектакль «Нарт Сослан»-ы бындуры та æвæрд уыд Хъайттаты Сосланы пьесæ. Спектаклы баиу сты традицион сюжеттæ æмæ нырыккон царды актуалон фарстатæ. Режиссер у, рауагъдон курсы педагог, Цæгат Ирыстоны адæмон артист, Цæгат Ирыстоны паддзахадон университеты театралон аивады кафедрæйы сæргълæууæг Æлбегаты Алан.
