Ахуырадон фестиваль канд зонындзинæдты бæрæгбон нæу, фæлæ ма хъæппæристы æмæ креативон уынаффæты фæз дæр
Лекцитæ, наукон квизтæ, дæсныйадæвдисæг ахуыртæ. Цæгат Ирыстоны паддзахадон университеты ацыдысты наукæйы бонтæ. Ахуырадон фестиваль канд зонындзинæдты бæрæгбон нæу, фæлæ ма хъæппæристы æмæ креативон уынаффæты фæз дæр. Фæсивæд уæлдай æргом здахынц иртасæн архайдмæ. Уый та дзурæг у ууыл, æмæ Ирыстоны наукæйæн ис стыр фидæн.
Цалынмæ физиктæ-студенттæ дисыфтауæг эксперименттæ æвдисынц, уæдмæ фидæны филологтæ ныхас кæнынц æвзаджы феноментыл, дзурынц лингвистикон иртæстыты хатдзæгты тыххæй. Алы факультет дæр бацæттæ кодта йæхи цымыдисаг наукон программæ. Сæрмагонд æргом юридикон дæсныйады студенттæн. Аудиторийы цæуы тæрхонгæнæн процесс.
Цæгат Ирыстоны паддзахадон университеты наукæйы бонтæ сты традицион. 2 бонмæ ахуыргæнæндон сси æрмæст зонындзинæдтæ æвдисыны фæз нæ. Студентты разæнгард кæнынц ног бæрзæндтæм. Ахуырады æмæ наукæйы министры хæдивæг Габеты Вадимы ныхæстæм гæсгæ, ацы мадзал у æцæг студентон бæрæгбон.
Кадджын уавæры схорзæхджын кодтой фароны фестивалы уæлахиздзауты. Университеты проректор Тенгиз Тиникашвили куыд загъта, афтæмæй студенттæ бацæттæ кодтой наукон-иртасæн куыстытæ. Докладтæн æмæ рефераттæн аргъ кæндзæн тæрхонгæнджыты совет. Фæлæ æрмæджытæ бæрзонд æмвæзадыл конд кæй сты, уый ныридæгæн бæлвырд у.
Мадзал бабæрæг кæныны фадат уыд æрмæст студенттæн нæ, фæлæ скъоладзаутæн дæр. Ахуырдзаутæн бацæттæ кодтой лекцитæ, наукон квизтæ. Алкæмæндæр йæ бон уыд дæсныйадæвдисæг ахуырты бацархайын, бакæсын наукон-популярон кинонывтæм.
