Цæгат Ирыстоны паддзахадон университеты хатдзæгтæ скодтой 2019-æм азы куыстæн, стæй æрдзырдтой ацы азы нысантыл. Æмбырды архайдта республикæйы Хициуады сæрдар Тускъаты Таймураз. Уæлдæр ахуыргæнæндоны ректор Огъуаты Алан радзырдта афæдзмæ сын цы бантыст саразын, уый тыххæй. Байгом кодтой Скæсæйнаг бæстæтæ зонадон хайад, Цæгат Кавказы фыццаг æфсæддон ахуырадон центр æмæ Касперскийы лаборатори. Æмгуыстад кæнын райдыдтой Испани, Иран, Германи æмæ Францийы университеттимæ, Ахуыргæнæндон ма бадзырдтæ бафыста Уæрæсейы Наукæты Академийы центримæ, байгом кодтой Уæрæсейы Хуссар хайы фыццаг ядерон иртæстыты иугонд институты информацион центр. Уыимæ, 2019 азы университет сси 7 конкурсы уæлахиздзау. Райстой дзы стыр гранттæ. Æмбырды дыккаг фарста та уыд, университеты президенты куысты рæстæг кæй аивгъудта, уымæ гæсгæ йæ ногæй равзарын. Уыцы бынатмæ радон хатт æвзæрст æрцыд Мæхæмæтты Алиханы фырт Ахуырбег.
