Цалдæр боны дæргъы сæ профессионалон дæсныйады ерыс кæндзысты 200 конкурсанты
Цæгат Ирыстоны паддзахадон университеты кадджын уавæры байгом регионалон чемпионат «Æрыгон профессионалтæ» (WorldSkills Russia). Цалдæр боны дæргъы сæ профессионалон дæсныйады ерыс кæндзысты 200 конкурсанты. Аргъ та сын кæндзысты 200 экспертæй фылдæр. Ацы аз ерыстæ цæуынц 29 компетенцимæ гæсгæ. Архайдзысты дзы профессионалон ахуыргæнæндæтты студенттæ 16-æй – 22 азы онг.
Сæ тыхтæ бафæлварыны фадат дзы 5 компетенцимæ гæсгæ сæ бон уыдзæн скъоладзаутæн дæр – 14 азæй 16 азы онг. Сæрмагондæй уыдонæн арæзт æрцыд WorldSkills Russia Juniors. Ныридæгæн кусы хицæн компетенция «Мастер леса». Уымæй дарддæр ерысы архайынц, 50 азæй фылдæр кæуыл цæуы, ахæм профессионалтæ дæр. Уыдон та сæ зонындзинæдтæ фæлварынц ахæм къабазы, куыд «Навыки мудрых». Хаст æм æрцыдысты 4 компетенцийы. Гом регионалон чемпионаты географи у уæрæх. Цæгат Ирыстонмæ ссыдысты минæвæрттæ Санкт-Петербургæй, Татарстанæй, Дагестанæй, стæй Хуссар Ирыстонæй. Чемпионаты хатдзæгтæм гæсгæ конд æрцæудзæн нæ республикæйы иугонд командæ. Уый архайдзæн конкурсы Национ чемпионаты æвзарæн мадзæлтты.
