Архайы дзы 50 ахуыргондæй, лингвистæй æмæ литературæиртасæгæй фылдæр Уæрæсейæ æмæ Иранæй
Цæгат Ирыстоны паддзахадон университеты цæуы æппæтуæрæсеон наукон-практикон конференци «Пысылмон Республикæ Ираны уырыссаг æвзаг, литературæ æмæ культурæ парахат кæныны лыггæнинаг фарстаты æмæ гæнæнты иртæстытæ». Архайы дзы 50 ахуыргондæй, лингвистæй æмæ литературæиртасæгæй фылдæр Уæрæсейæ æмæ Иранæй. Хатдзæгтæм гæсгæ уагъд æрцæудзæн æрмæджыты æмбырдгонд уырыссаг æмæ ирайнаг æвзæгтыл. Бæстондæр радзурдзæн Хъайтмазты Дзерассæ.
Конференцийы куыст райдыдта дидинджытæ сæвæрынæй. Цæгат Ирыстоны паддзахадон университеты делегаци æмæ Пысылмон Республикæ Иранæй уазджытæ æрхъуыды кодтой зындгонд поэттæ Хетæгкаты Къостайы æмæ Фирдоусийы нæмттæ. Фысджытæй алчидæр уыд йæ адæмы удварны хæзнаты символ. Ирайнаг поэты цыртдзæвæны цур студенттæ бакастысты æмдзæвгæ йæ мадæлон æвзагыл – фарсийыл.
Мадзал дарддæр ахæццæ ис ЮНЕСКО-йы залы. Пленарон æмбырды архайдтой республикæйы Сæргълæууæг Сергей Меняйло, Парламенты сæрдар Тускъаты Таймураз, университеты ректор Огъуаты Алан, кадджын уазæг сси Алламе Табатабаийы номыл Тегераны университеты президент Шоджа Ахмадванд. Ахуыргæндтæ æрныхас кодтой уæрæсейаг-ирайнаг æмгуыстады ахсджиаг фарстатыл ахуырады, наукæйы æмæ культурæйы къабæзты, стæй уырыссаг æвзаг æмæ литературæ Ираны парахат кæныныл.
Цæгат Ирыстоны паддзахадон æмæ Тегераны университетты *хсæн æмгуыстад райдыдта 2016-æм азы. Уæдæй фæстæмæ æххæстгонд цæуы кæрæдзийы фæлтæрддзинад исыны программæ. Студенттæ æмæ ахуыргæнджытæ бабæрæг кæнынц уæлдæр ахуыргæнæндæттæ, фæархайынц наукон проектты æмæ культурон мадзæлтты. Паддзахадон университеты ректор Огъуаты Алан куыд загъта, афтæмæй ахæм æмгуыстад пайдайаг у 2 уæлдæр ахуыргæнæндонæн дæр.
Конференци сæмбырд кодта 50 ахуыргондæй, лингвистæй æмæ литературæиртасæгæй фылдæр Уæрæсейæ æмæ Иранæй. Архайджытæ куыд зæгъынц, афтæмæй ахæм фембæлдтытæ æнгомдæр кæнынц гуманитарон бастдзинæдтæ æмæ хорз ахадынц наукон æмгуыстады райрæзтыл.
Конференци цæудзæн 2 боны. Йæ хатдзæгтæм гæсгæ уагъд æрцæудзæн æрмæджыты æмбырдгонд уырыссаг æмæ ирайнаг æвзæгтыл.
