Уымæ гæсгæ равдыстой кинонывтæ «Без срока давности. Несломленная Осетия» æмæ «Без срока давности. Геноцид»
Цæгат Ирыстоны паддзахадон университеты уыд фестиваль «Дорогами памяти и славы». Уымæ гæсгæ равдыстой кинонывтæ «Без срока давности. Несломленная Осетия» æмæ «Без срока давности. Геноцид». Дзурынц нацистты фыдракæндты тыххæй Фыдыбæстæйы Стыр хæсты азты. Фестиваль арæзт æрцыд культурон хъæппæристы президентон фонды æххуысæй. Бæлвырддæр радзурдзæн Хъайтмазты Дзерассæ.
Фыдыбæстæйы Стыр хæсты рæстæг республикæйы цы карз цаутæ цыд, уыдоны тыххæй сæрмагонд документтæ. Кинонывтæ равдыстой фестиваль «Дорогами памяти и славы»-йы. Цæгат Ирыстоны паддзахадон университеты концертон залы сæмбырд сты студенттæ æмæ ахуыргæнджытæ.
Кинонывтæ «Без срока давности. Несломленная Осетия» æмæ «Без срока давности. Геноцид» сисынæн бахъуыдысты мæйтæ. Хъуыдис сæмбырд кæнын æппæт документалон æрмæджытæ. Цыдис стыр слестгæнæн куыст. Фыдыбæстæйы Стыр хæсты азты Цæгат Ирыстоны хуымæтæг цæрджыты карзæй чи æфхæрдта, уыцы фыдгæнджыты номхыгъд ныры онг æххæстгонд цæуы ног нæмттæй. Республикæйы прокуратурæ лæмбынæг æркаст æппæт бæрæггæнæнтæм æмæ документтæм, цæмæй Цæгат Ирыстоны цæрджыты геноцид тæрхондоны фидаргонд æрцæуа.
Цæгат Ирыстоны территорийы 80 азы фæстæ рабæрæг нацистон бабырсты фæд. Республикæйы цæрджыты пырх кæныны архайдтой финаг бархионтæ дæр. Æхгæд финаг архивты ссардтой адæмы чи мардта, уыцы салдæтты сусæггонд бончингуыты. Кинонывтыл кусгæйæ, йæ саразджытæ æмбырд кодтой информаци архивты. Араст сты, оккупацийы Цæгат Ирыстоны цы хъæутæ æмæ горæттæ уыдысты, уырдæм, цæмæй уыцы рæстæг чи фæмард, уыдоны хæстæджытимæ аныхас кæнгæйæ базоной, хабæрттæ æцæгæй куыд уыдысты, уый.
Фестиваль «Дорогами памяти и славы» сарæзта æфсæддон-историон кинойы фонд, культурон хъæппæристы президентон фонды æххуысæй æппæтуæрæсеон змæлд «Без сроков давности» æххæстгæнгæйæ.
