Уый фæрцы республикæйы техникумтæ æмæ колледжтæ бабæрæг кодтой скъоладзаутæ æмæ сæ ныййарджытæ
Цæгат Ирыстоны профессионалон ахуыргæнæндæтты арæзт æрцыд гом дуæртты иумæйаг бон. Уый фæрцы республикæйы техникумтæ æмæ колледжтæ бабæрæг кодтой скъоладзаутæ æмæ сæ ныййарджытæ. Базонгæ сæ кодтой ахуырадон программæтимæ, материалон-техникон бындуртимæ. Уымæй дарддæр лæппутæ æмæ чызджытæ бацархайдтой дæсныйадæвдисæг ахуырты. Афтæмæй рæзгæ фæлтæрæн фадат фæци сæ фидæны дæсныйæдты тыххæй фылдæр зонындзинæдтæ райсынæн.
Цалдæр хуымæтæг, фæлæ бæлвырд змæлды æмæ абитуриенты къухы февзæрд хиконд тюльпан. Сæрмагонд фæзуаты фидæны педагогты ахуыр кæнынц, сывæллæтты къухты сæрæндзинадыл куыд бакусæн ис, уый сусæгдзинæдтыл. Сыхаг кабинеты та рацу-бацу кæны, конструкторæй кæй æрæмбырд кодтой, ахæм конструктор. Интерактивон ифтонгарз ис нæ республикæйы алы скъолайы дæр.
Фидæны ахуыргæнджытæ æрбамбырд сты Цæгат Ирыстоны педагогон колледжы гом дуæртты боны æмæ бабæрæг кодтой алыхуызон профессионалон фæзуæттæ. Базонгæ сты æнгомдæр куыд скъолайы, афтæ скъолайы агъоммæйы ахуырады дæсныдзинæдтимæ. Ахуыргæнæндоныл сын экскурси скодтой колледжы студенттæ. Равдыстой сын музыкалон уазæгдон, ювелирон æрмадз, скульптурæйы æрмадз æмæ техникон сфæлдыстады кълас. Болиаты Аделинæйы раз ис нысан — хъæуы йæ æлыгæй саразын агуывзæйыл хæцæн æмæ йæ бандадзын. Чызг куыд зæгъы, афтæмæй куыст сæ зынтæй нæу, стæй йæ æххæст дæр зæрдиагæй кæны.
Колледжы гом дуæртты боны официалон хай цалдæр минуты йедтæмæ нæ уыдис. Уазджытæ сæйрагдæр тырныдтой профессионалон фæзуæттæм. Æппæты фылдæр адæм æрбамбырд нырыккон ахуыргæнджыты сусæгдзинæтты фæзы. Уым бахастой фæндон, цæмæй скъоладзаутæ сæ хæдзармæ куыст кæной социалон хызты кæнæ та æндæр нымæцон ирхæфсæнты фæрцы.
Колледжы цæттæдзинад фенын æмæ фидæны студенттимæ базонгæ кæныны нысанимæ æрбацыдис ахуырад æмæ наукæйы министр Алыбекты Эллæ.
Абитуриенттæн сæ бон уыдис ацæуын профориентацион иртæстытæ, цæмæй бæлвырдæй феной сæ фидæн ахуыргæнæджы дæсныйады. Гаянэ Парсамянц ахуыр кæны педагогон къласы æмæ йæхицæн фидарæй скарста, уырыссаг æвзаг æмæ литературæйы ахуыргæнæг кæй суыдзæн, уый.
Педагогон колледжмæ цы абитуриенттæ æрбацæуынц, уыдон фидар зонынц, сæ фидæн ахуыргæнæджы дæсныйадимæ кæй сбæтдзысты, уый.
Дзæвгар фæсивæд æрбацыд базарадон-экономикон колледжмæ. Фæстаг рæстæг æрыгон адæм арæхдæр æвзарынц кусгæ дæсныйæдтæ. Уымæй уæлдай раздæрау бирæ агурджытæ ис бухгалтеры æмæ туризмы специалистты дæсныйæдтæ. Колледжы ахуыргæнджытæ куыд зæгъынц, афтæмæй сæ студенттæ иннæты æхсæн кæдфæндыдæр бæрæг фæдарынц — кусынц сæхиуыл æмæ архайынц сæ профессионалон рæзтыл.
Абитуриентты хъæуы равзарын сæ фидæны дæсныйад, фæлæ бирæтæ нырма нæма сбæрæг кодтой, ахуыр кæнынмæ кæдæм бацæудзысты, уый. Уый тыххæй цæуынц алыхуызон ахуыргæнæндæттæм æмæ æвзарынц факультеттæ.
Уалдзæджы хистæркъласонты хъæуы скæнын фыццаг къахдзæфтæ сæ фидæны дæсныйадмæ. Уый тыххæй ныртæккæ æвзарынц астæуккаг профессионалон ахуыргæнæндон.
