Уый кадæн Дзæуджыхъæуы арæзт æрцыдысты бæрæгбоны мадзæлттæ
Цæгат Ирыстоны пысылмæтты управленийыл сæххæст 30 азы. Уый кадæн Дзæуджыхъæуы арæзт æрцыдысты бæрæгбоны мадзæлттæ. Кадджын фембæлдмæ æрæмбырд сты Уæрæсейы алы регионтæй, æмæ фæсарæйнаг бæстæтæй пысылмæтты управлениты минæвæрттæ. Æдæппæтæй 200 адæймагæй фылдæр. Уæвгæ, пысылмæтты управленийы фæзынд 90-æм азты уыд зын, фæлæ бæрнон уынаффæ. Ахсджиаг уыд уырнæг адæмы æрбангом кæнын, мæзджыттæ сног кæнын, фæсивæды хъомыладыл кусын. Цæгат Ирыстоны пысылмæтты управлени, йæ сæргъы Гуæцæлты Хадзымуратимæ уыцы хæстæ æнтыстджынæй æххæст кæнынц. Парламенты Сæрдар Тускъаты Таймураз закъонæвæрæн оргæны номæй кады гæххæттытæ æмæ арфæйы фыстæджытæ радта управленийы минæвæрттæн. Нæ республикæйы муфтий куыд бафиппайдта, афтæмæй сæ ахадгæ куыст кæндзысты дарддæр. Архайдзысты сабырдзинад æмæ хæлардзинады тæгтæ фидардæр кæныныл.
