Мадзал ацæудзæнис республикæйы æмвæзадыл ахуырады министрады фарсхæцтæй æмæ дзы ерыс кæндзысты, скъолаты хæрæндæтты чи кусы, уыдон
Цæгат Ирыстоны райдайдзæнис скъолаты хæрæндæтты кусджыты дæсныдзинады чемпионат. Мадзал ацæудзæнис республикæйы æмвæзадыл ахуырады министрады фарсхæцтæй æмæ дзы ерыс кæндзысты, скъолаты хæрæндæтты чи кусы, уыдон. Чемпионаты архайдзысты 23 адæймаджы нæ республикæйы æппæт районтæй. Уыдонæй алчидæр хъуамæ сæххæст кæна æртæ хæслæвæрды. Конкурсы нысан у скъолайы хæрæндæтты кусджыты хсæн æппæты дæсныдæр специалисттæ сбæрæг кæнын, æмæ сæ ног æмвæзадмæ схизынмæ разæнгард кæнын. Чемпионаты рæстæг сараздзысты алыхуызон конференцитæ, дæсныйадæвдисæг ахуыртæ дзулфыцынæй, адджинæгтæ кæнынæй æмæ æндæртæй. Номдзыд ресторатортæ равдисдзысты скъолайы менютæ сæхи хъуыдымæ гæсгæ. Архайджытæ уымæй уæлдай сæ фарстатæ ратдзысты ахуырады æмæ наукæйы министры хæстæ рæстæгмæ æххæстгæнæг Людмилæ Башаринæмæ. Чемпионаты бæрæггæнæнтæм гæсгæ сараздзысты нырыккон скъолайы хойраджы æмбырдгонд.
