Хицауады Хæдзары Ног азы фидауц саив кодтой бæллицты 43 шарæй
Ралæууыд бæллицтæ æххæстгæнæн рæстæг. Цæгат Ирыстоны райдыдта акци «Бæллицты заз бæлас». Мадзал арæзт цæуы алы аз дæр 2018-æм азæй фæстæмæ. Традицимæ гæсгæ сæ ахсджиагдæр фæндтæ æмæ бæллицтæ фехъусын кæнынц фæкæсынхъуаг бинонтæй сабитæ, сидзæр сывæллæттæ, инвалидтæ, стæй йе нæниздзинад хъыгдард кæмæн у, ахæм ацæргæ адæм. Сæххæст сын сæ кæнынц хицауады минæвæрттæ: министртæ, районты сæргълæуджытæ, депутаттæ æмæ республикæйы разамынд. Ацы аз сæ курдиæттæ балæвæрдтой 600 адæймаджы онг. Ныры онг уал бакуыстой се рдæгыл. Ахæм бæллицты заз бæлæстæ сæвæрдтой республикæйы районты центрты дæр. Акци цæудзæн февралы кæронмæ. Хицауады Хæдзары Ног азы фидауц саив кодтой бæллицты 43 шарæй. Фыццаг шар райста Сергей Меняйло. Республикæйы Сæргълæууæг сæххæст кæндзæн 3 бæллицы. Сæ хицæуттæ та сты Дзæуджыхъæуы æвзонг цæрджытæ – Быгъуылты Зæлинæ, Хуыбецты Амагæ æмæ Даниил Долганов.
