Архайынц дзы нæ бæстæйы алы регионтæй 45 бархионы
Цæгат Ирыстоны райдыдта волонтерты VI-æм æппæтадæмон проект «Маяки дружбы. Башни Кавказа». Архайынц дзы нæ бæстæйы алы регионтæй 45 бархионы: Уæрæсейы Центрон æмæ Хуссар хайæ, Ныгуылæн Сыбырæй æмæ Цæгат Кавказæй. Проекты пресс-службæ куыд хъусын кæны, афтæмæй отряд «Маяки дружбы»-йы ис æртæ къорды: сæ иу – «Кунаки» – кусдзæн Алагиры районы Хуырымты мыггаджы, дыккаг – «Орлы» – Мæхъæлы республикæйы мæсгуыты комплекс «Харп»-ы, æртыккаг «Горцы» та – хъахъхъæнæг мæсыг Дагестаны рагон хъæу Старый Хиндахы. Чи сфидар, уыцы практикæмæ гæсгæ волонтертæ боны фыццаг æмбисы кæнынц æхсæнадæн пайдайаг куыстытæ. Кусынц культурон-историон хæзнаты объектты. Уымæй дарддæр аразынц экологон акцитæ. Боны дыккаг æмбисы та проекты архайджытæ зонгæ кæндзысты регионтимæ. Æнæмæнг базонгæ уыдзысты республикæйы историон æмæ национ-культурон æууæлтимæ. Арæзт сын цæудзысты дæсныйадæвдисæг ахуыртæ æмæ экскурситæ. Уымæй уæлдай ма фестивалы архайджытæ сæхи бафæлвардзысты журналистты-блогерты хуызы. Алы бон цæттæ кæндзысты репортажтæ æмæ онлайн-боныгтæ. Пайда кæндзысты куыд текстытæй, афтæ хуызистытæй æмæ видеопубликацитæй. Иу ныхасæй сæ экспедицийæн скæндзысты бæстон æмæ алывæрсыг анализ. Стæй йæ хатдзæгтæм гæсгæ сæхи регионты сисдзысты цыбырметражон кинонывтæ. Фестивалæн хатдзæгтæ скæндзысты 2-æм августы Цæцæны республикæйы.
