Ацы аз, программæйы руаджы нæ республикæйы 13 ахуыргæнæджы райсдзысты фæйнæ иу милуан сомы
Цæгат Ирыстоны райдыдтой исын, программæ «Земский учитель»-ы архайын кæй фæнды, уыдоны документтæ. Ацы аз, программæйы руаджы нæ республикæйы 13 ахуыргæнæджы райсдзысты фæйнæ иу милуан сомы. Профилон ведомствæйы куыд бамбарын кодтой, афтæмæй куысты бынæттæ ис Алагиры, Мæздæджы, Æрыдоны, Æрæфы, Кировы æмæ Горæтгæрон районты. Уыцы ваканситæй æхсæз сты уырыссаг æвзаджы ахуыргæнджытæ, дыууæ — физикæйы ахуыргæнджытæ, дыууæ математикæйы. Уымæй уæлдай агурынц райдайæн кълæсты ахуыргæнджыты, стæй хими æмæ англисаг æвзаг чи амондзæн, ахæм педагогты. Конкурсы æвзæрстыты архайыны бар ис куыд фæлтæрдджын ахуыргæнджытæн, афтæ йæ дæсныйады фыццаг къахдзæфтæ чи кæны, уыцы æрыгон специалисттæн дæр. Æппæт информаци дæр ис базонæн ахуырады æмæ наукæйы министрады сайты. Документтæ исдзысты 15-æм апрельмæ.
