Уыналы ныртæккæ исынц цыбыр киноныв
Цæгат Ирыстоны райдыдтой видеоконтент аразын, æмæ баст уыдзæн алайнаг адæмы культурæимæ. Уыналы ныртæккæ исынц цыбыр киноныв. Уым ирдæй равдисдзысты ирон адæмы рагон æгъдæуттæ æмæ цардыуаджы миниуджытæ. Историон лентæйы лыстæг хъуыддæгтæ нæй, алцыдæр у ахсджиаг. Сæйраг сценæтæ исынц Цæллагты мыггаджы этно-культурон комплексы. Социалон-культурон проект æххæстгонд цæуы культурон хъæппæристы фонды æххуысæй. Хъайтмазты Дзерассæ радзурдзæн бæлвырддæр хабæрттæ.
Кинонывы фæз Цæллагты мæсыджы бацæттæ кодтой 2 бонмæ. Кадры чысыл æнæхъæугæ дзаума дæр бахъыгдардзæн аивадуарзджыты рагон дуджы тæваг æххæстæй банкъарын.
Цыбыр кинонывы сценæты æвдыст цæуынц, сæрмагонд нысаниуæг кæмæн уыд, æмæ бæлвырд фæткмæ гæсгæ æххæстгонд чи цыд, уыцы рагон æгъдæуттæ. Зæгъæм, уазджытыл æмбæлыны традици. Фысымтæ уазæджы бæхмæ хъуамæ æндзæвгæ дæр ма бакодтаиккой – не *мбæлыд. Ахæм сусæгдзинæдтæ арæх сбæрæг вæййынц киноныв исыны рæстæг. Ирон театры артист Хъæцмæзты Лазарь хорз зоны фыдæлты æгъдæуттæ. Уымæ гæсгæ проекты архайы æрмæст куыд актер нæ, фæлæ ма куыд консультант афтæ дæр.
Цыбыр сюжет Ирыстоны нымæты куыст кæныны традицийы тыххæй æвдыст цæуы зарæджы фæрцы дæр. Рагæй дæр æй зарыдысты сылгоймæгтæ уæлæдарæн нымæт кæнæ худ цæттæгæнгæйæ. Ацы сценæ сисынмæ æрбахуыдтой, хоры чи архайы, ахæм зарæггæнджыты.
Цæмæй сæхи кадры хуыздæр æнкъарой, уый тыххæй актертæ бынаты ахуыр кæнынц рагон хъæзтытæй хъазын, бæхыл бадын, мигæнæнтæй пайда кæнын –19-æм æнусы райдиан Ирыстоны куыд æмбæлыд, афтæ хи дарын. Суанг ма нымæты куыст кæнын дæр актрисæты ахуыр кодтой æцæг дæснытæ.
Режиссер-æвæрæг Пагæты Фатимæйæн уый у кинонывы сæйраг хæзна. Кæд ма суанг сфæлдыстадон къорд дæр ирон традициты дуне йæхицæн ногæй байгом кодта, уæд æй аивадуарзджытæ та ноджы лæмбынæгдæр базонындзысты рæсугъд æмæ бæстон видеоæрмæджы фæрцы.
Кинонывы бюджет стыр нæу. Проект у пилотон. Уымæ гæсгæ, йæ аразджыты ныхæстæм гæсгæ, ахсджиаг уыд, иузæрдион адæмы æрæмбырд кæнын, кадры ирон адæмы рæсугъддзинад æмæ эстетикæ равдисын кæй бафæнда, уыдоны.
Киноныв фенын уыдзæн æппæт гом интернет-ресурсты. Уый æнæмæнг хорзырдæм фæзындзæн регионы туристон къабазыл дæр. Автортæ куыд зæгъынц, афтæмæй нымæты куыст кæныны тыххæй сюжет адæмы зæрдæмæ куы фæцæуа, уæд ма сисдзысты цалдæр кинонывы. Сæйрагдæр та уыдзысты традицитæ æмæ æгъдæуттæ.
