Дзæуджыхъæуы уал ныссагътой 79 бæласы
Ацы хъуыды уæлдай ахсджиагдæр у Стыр Уæлахизы 75 азы боны агъоммæ. Уый кадæн Уæрæсейы расидтысты акци «Сады памяти». Ныр цалдæр боны нæ бæстæйы алы регионты ветерантæ, скъоладзаутæ, æхсæнадон кусджытæ хæстонты номыл садзынц талатæ. Цæгат Ирыстоны уал ныссагътой 79 бæласы. Уый у – нæ республикæйæ Советон Цæдисы хъæбатыры ном чи райста, уыйбæрц. 9-æм майы та ма Дзæуджыхъæуы фæзындзæн зæрдылдарæн монумент. Ирыстон чи хъахъхъæдта, уыцы 16 мин сырхæфсæддоны номыл. Патриотон проекты тыххæй бæстондæр радзурдзæн Фидараты Маринæ.
Цæгат Ирыстонæй Советон Цæдисы хъæбатыры ном чи райста, уыдон мысынæн нæ республикæйы ныссагътой 79 талайы. Аллеяйы бахизæны та номарæн дур. Цæмæй йæ алчидæр зона, ай хуымæтæг цæхæрадон кæнæ дыргъдон нæу. У, фронтæй чи нал сыздæхт, уыдоны мысæн бынат. Цæгат Ирыстон бацархайдта Æппæтуæрæсеон акцийы «Сады памяти». Нæ бæстæйы йæ расидтысты 18-æм мартъийы. Июны кæронмæ ма хъуамæ ныссадзой 27 милуан талайы.
Фæлтæрты бастдзинад уый у æппæтæй ахсджиагдæр, 75 азы размæ цы цаутæ цыди, уыдон зæрдыл дарынæн. Ветерантæ дæр зæрдиагæй бацархайдтой ацы акцийы. Кæд бирæ нæ уыдысты, уæддæр сæ хæсыл банымадтой æрбацæуын, æмæ се дзæрд æмгæртты æрымысын. Йæхи бæлас ныссагъта Хуадонты Ехья дæр. Фыдыбæстæйы Стыр хæсты архайæгыл цæуы 95 азы, фæлæ ныр дæр хæст хъуыды кæны, суанг лыстæг хъуыддæгты онг. Уыимæ фылдæр дзурын уарзы сабырдзинады темæйыл.
Æппæтуæрæсеон адæмон фронты фæсивæдон къорды уæнгтæ, Уæлахизы волонтертæ, ирвæзынгæнджыты Уæрæсейаг цæдис, скъоладзауты змæлд, бæрнон кусджытæ æмæ æхсæнадон архайджытæ. Ахæм иудзинад хорзыл банымайæн ис, загъта республикæйы сæргълæууæг Битарты Вячеслав. Уый дæр зæрдиагæй бацархайдта акцийы.
Акцимæ ма се вæрæн бахæссынмæ хъавынц Хæдбар паддзахадты æмхæларады иуæй-иу бæстæтæ дæр. Уыдон хорз хъуыды кæнынц советон салдæтты хъæбатырдзинад. Ирыстоны уый канд патриотон проект нæу, фæлæ ма экологон.
Æфсæддоннамысы горæтмæ, кæй зæгъын æй хъæуы, хæсты тыххæй мысинæгтæ бирæ. Афтæ Цæгат Ирыстонæн дæр. 95 мин салдаты ацыд нæ республикæйæ фронтмæ. Сæ рдæг сæ фыдыуæзæгыл нал сæмбæлыдысты. 79 адæймагæн лæвæрд æрцыд Советон Цæдисы хъæбатыры ном. Дыууæ та уыцы кадджын ном райстой дыууæ хатты.
Номарæн бынат хуымæтæджы нæ равзæрстой. Ам алцыдæр дзурæг у Фыдыбæстæйы Стыр хæстыл. Йæ фарсмæ хъæбатырты аллея æмæ намысы мемориал. Цы фæндаг æм цæуы, уый та бахæццæ хъизæмаргæнæг æфсæддон-Иоанны номыл аргъуанмæ. 9-æм майы та ма ам фæзындзæн зæрдылдарæн монумент. Ирыстон чи хъахъхъæдта, уыцы сырхæфсæддонты номыл. Æдæппæтæй – 16 мин адæймаджы. Акци «Сады памяти» сси иумæйаг намысы мемориалы иу хай. Афтæмæй ма иу хатт се ппæты зæрдыл дæр лæууын кæны – ничи ферох, ницы ферох.
