Уый тыххæй Оперативон штабы æмбырды фехъусын кодта республикæйы клиникон рынчындоны сæйраг дохтыр Митциты Астан
Цæгат Ирыстоны рынчындæттæм туаггуыр ласынæн æнæмæнг хъæуы резервон транспорт. Уый тыххæй Оперативон штабы æмбырды фехъусын кодта республикæйы клиникон рынчындоны сæйраг дохтыр Митциты Астан. Куыд радзырдта, афтæмæй сæм цы 3 машинæйы ис, уыдонæй иу нæ кусы. Уымæ гæсгæ хъæуы резервон машинæ. Регионы разамонæг Сергей Меняйло æнæниздзинадхъахъхъæнынады стæй промышленносты æмæ транспорты министрадтæн бабар кодта республикæйы рынчындæттæм цыбыр æмгъуыдмæ туаггуыр ласыны фарста банывыл кæнын. Уыимæ куы сæвзæры, уæд æй хъæуы æвæстиатæй фехъусын кæнын.
Æнæниздзинадхъахъхъæнынады министры хæстæ æххæстгæнæг Тебиаты Сослан фехъусын кодта, ныртæккæ сæрмагонд транспорт кæй агуырнц, уый. Республикæйы Сæргълæууæг та бахаста фæндон Уæрæсейы промышленносты æмæ базарады Министрадмæ курдиат бадæттыны тыххæй, сæрмагондæй туаггуырæн машинæ самал кæнынæн. Уæвгæ та нæ республикæ туаггуырæй цух не ййафы. Æнæнхъæлæджы уавæрты рæстæг та йæ ласдзысты Кæсæг-Балхъарæй æмæ Стъараполы крайæ. Хаст æрцыд уынаффæ, республикæйы клиникон рынчындонмæ иннæ дзæбæхгæнæндæттæй туаггуыры баллонты иу хай баласын. Уыимæ хъуамæ рынчындæтты куыст ма бакъылымпы уа, загъта Сергей Меняйло. Базонын ма йæ фæндыд, Цæгат Ирыстонмæ кæй æрбаластой, уыцы тагъд æххуысы 9 машинæйы хъысмæт. Нæ республикæйы фæзындысты мæйы размæ, фæлæ ныры онг эксплуатацийы лæвæрд нæма рцыдысты. Куыд рабæрæг, афтæмæй уал сын кæнынц гæххæттытæ, æмæ уыцы куыст хъæуы фæтагъддæр кæнын.
