Цæгат Ирыстоны Сæргълæууæг Сергей Меняйло архайдта сæрмагонд æмбырды, национ проект «Чысыл æмæ астæуккаг амалхъомдзинады» æмæ регионты куысты фарстаты фæдыл. Æмбырд видеоконференцийы хуызы амыдта нæ бæстæйы Хицауады Сæрдары фыццаг хæдивæг Андрей Белоусов, æмæ дзы архайдтой хицауады уæнгтæ стæй субъектты разамонджытæ. Андрей Белоусов йæ раныхасы сбæрæг кодта цалдæр регионы, се хсæн Цæгат Ирыстон афтæмæй, чысыл æмæ астæуккаг бизнесы хорз бæрæггæнæнтæ чи вдисы, ахæмтæ. Сергей Меняйло бахахх кодта, 2021-æм азы национ проект «Чысыл æмæ астæуккаг амалхъомдзинадæн æххуыс» æххæст кæнгæйæ, Цæгат Ирыстонæн радих кодтой 36 милуан сомæй фылдæр. Фæрæзтæ æххæст кæнынц, амалхъомдзинады инфраструктурæйæн æххуысы организацитæ. 2021-æм азы бакодтой 18 мин лæггады. Бацæттæ кодтой 1793 бизнес-пъланы социалон контрактмæ гæсгæ.
Сæхи куысты хыгъды сæвæрдтой 549 адæймаджы. Ивгъуыд аз ма 6 социалон куыстуаты гранты хуызы æххуыс райстой 500 мин сомы, загъта республикæйы Сæргълæууæг. Амалхъом адæмы æнцондзинадæн Центр «Мой бизнес»-ы хайæдтæ байгом кодтой республикæйы æппæт муниципалитетты, æмæ дзы адæмæн кæнынц алывæрсыг лæггæдтæ. Уæлдай парахатдæр кæнынц райдайгæ фермертæн æмæ бинонты фермерон хæдзарæдтæн сæрмагонд программæтæ. Уымæй дарддæр ахадгæ у – фæсивæды амалхъомдзинадмæ здахыны программæ дæр. Æххæст æй кæнынц республикон бюджеты фæрæзтæй, бафтыдта Сергей Меняйло.
