Æрныхас кодтой, нæ республикæйы территорийы федералон нысаниуæг кæмæн ис, уыцы фæндæгты арæзтадыл æмæ рацарæзтыл
Цæгат Ирыстоны Сæргълæууæг Сергей Меняйлойæн кусæг фембæлд уыд федералон куыстуат «Кавказы автомобилон фæндæгты Управленийы» хицау Александр Лукашукимæ. Æрныхас кодтой, нæ республикæйы территорийы федералон нысаниуæг кæмæн ис, уыцы фæндæгты арæзтадыл æмæ рацарæзтыл. Бæстон æрдзырдтой Дзæуджыхъæуы иувæрсты цæуæг фæндаджы арæзтадыл. Куыстытæ ныртæккæ бацыдысты сæ тæмæны. Фæндаггон кусджыты сæйраг хæс у æдасдзинады фарстатыл æмæ экологон сыгъдæгдзинадыл бакусын, стæй транзитон транспорт горæтæй рацæуын кæнын, – загъта Александр Лукашук. Проектмæ гæсгæ арæзт æрцæудзæн ног фæндаггон инфраструктæрæ. Йæ уæрх уыдзæн 15 метры, алы фарс дæр фæйнæ 3 метры æмæ 75 см. Специалисттæ скæндзысты, 2 æмвæзады кæм уыдзæн, ахæм 3 пункты. Уымæй дарддæр 7 фæндаджы, уыдонæй 2 – тъунелы хуызы. Объекты ма рацараздзысты зæронд хид, æмæ сараздзысты ног конструкци. Шофыртæн ма скæндзысты нырыккон æрлæууæн бынат 600 машинæйæн, фæлладуадзæн зонæимæ æмæ сывæллæтты ирхæфсæн фæзимæ. Объекты сæвæрдзысты рухсгæнæнтæ, кæрæтты та бырутæ. Сергей Меняйло ма радзырдта, Уæрæсейæ Гуырдзыйы рдæм цæуæг уæзласæн машинæтæн Уæллаг Ларсы уадзæн пункты электрон рад кæй скодтой, уый тыххæй. Бахастой ма фæндон иумæйаг проект саразыны тыххæй.
