Ансамблæн разамынд лæвæрдта Уæрæсейы адæмон артист, инæлар-майор, дирижер Виктор Елисеев
Цæгат Ирыстоны Сæргълæууæг Сергей Меняйлойы Указмæ гæсгæ, музыкалон аивады сгуыхтдзинæдты тыххæй Уæрæсейы национ гвардийы кафты æмæ зарды Академион ансамблы артисттæ хорзæхджынгонд æрцыдысты кадджын нæмттæй. Афтæ, амæй фæстæмæ Республикæ Цæгат Ирыстон-Аланийы сгуыхт артисты ном хæсдзысты Михаил Зараев, Павел Пушкин, Иван Желнов, Данила Коренев, Марк Новиков æмæ Евгений Яхин. Ацы бонты зындгонд коллектив Дзæуджыхъæуы радта цымыдисаг концерт. Металлургты культурæйы Галуанмæ æрбахуыдтой Уæрæсейы гвардийы цæгатирыстойнаг Управленийы службæгæнджыты, хæсты æмæ фæллойы ветеранты, стæй горæты цæрджыты. Ансамблæн разамынд лæвæрдта Уæрæсейы адæмон артист, инæлар-майор, дирижер Виктор Елисеев. Концерты уазджытæн бацæттæ кодтой хъæздыг æмæ алывæрсыг программæ. Аивадуарзджытæ байхъуыстой нырыккон патриотон зарджытæм æмæ Советон рæстæджы композицитæм. Зæгъдзыстæм ма уый дæр, æмæ мадзал арæзт кæй æрцыд, ансамблы гастрольтæ Цæгат Кавказы федералон зылды регионтыл æххæст кæнгæйæ. Артисттæн хæрзиуджытæ радта Уæрæсейы гвардийы республикон Управленийы хицау, пъæлицæйы булкъон Валерий Голота. Раарфæ кодта музыканттæн, æмæ загъта, йæ зæрдæ кæй дары, ногæй та сæ аивадæй нæ республикæйы цæрджыты зæрдæтæ кæй барухс кæндзысты, ууыл.
