Йæ фæрцы лыггонд цæудзысты, æнæниздзинадхъахъхъæнынады къабазы специалисттæ кæй нæ фаг кæны, уыцы фарстатæ
Цæгат Ирыстоны сарæзтой регионалон медицинон ахуырадон кластер. Йæ фæрцы лыггонд цæудзысты, æнæниздзинадхъахъхъæнынады къабазы специалисттæ кæй нæ фаг кæны, уыцы фарстатæ. Ахæм кластертæ арæзт цæудзысты Уæрæсейы алы регионы дæр.
Астæуккаг æмæ уæлдæр ахуыргæнæндæттæ сæ тыхтæ баиу кодтой дæсны специалистты цæттæ кæныны хъуыддаджы. Медицинон ахуырадон кластеры хыгъдмæ бацыдысты республикæйы æнæниздзинадхъахъхъæнынады министрад, Цæгат Ирыстоны паддзахадон медицинон академи, Цæгат Ирыстоны паддзахадон университет, Цæгат Ирыстоны медицинон колледж æмæ профессионалон ахуырады 1-æм колледж.
Ныртæккæ куыст цæуы ног ахуырадон программæйыл ахуыргæнинæгтæн. Сæйраг хæс у – æнæниздзинадхъахъхъæнынады астæуккаг къабазы специалистты цæттæ кæныны æмвæзад фæхуыздæр кæнын.
Ахуырадон кластер арæзт æрцæудзæн Уæрæсейы алы регионы дæр. Ацы хъуыддаг æххæстгонд цæуы нацпроект «Дæргъвæтин æмæ активон цард»-мæ гæсгæ.
