Ацы аз преми райсыныл ерыс кодтой 10 адæймаджы
Цæгат Ирыстоны сбæрæг сты Хъамбердиаты Мысосты номыл Паддзахадон премийы лауреаттæ литературæйы къабазы. Ацы аз преми райсыныл ерыс кодтой 10 адæймаджы. Уыдон конкурсмæ балæвæрдтой куыд ирон, афтæ уырыссаг æвзагыл фыст уацмыстæ. Айдарты Алетæ, Æгъуызарты Сашæ, Уырымты Зауырбег æмæ Гуыбыраты Зæлинæ ерыс кодтой номинаци «Поэзийы». «Прозæйы» номинацийы сæ тыхтæ фæлвæрдтой Уыртаты Сæрмæт, Дзираты Дианæ æмæ Гобозты Агуындæ. «Драматургия»-йы номинацийы сæ куыстытæ бавдыстой Сугъараты Элинæ, Дарчиты Хетæг æмæ Артур Омаров. Сусæг æвзæрстыты рæстæг сбæрæг сты уæлахиздзаутæ. Равзæрстой сæ æрмæстдæр дыууæ номинаци – «Поэзи» æмæ «Драматургияйы». Хъамбердиаты Мысосты премийы лауреат ссис Гуыбыраты Зæлинæ йæ æмдзæвгæты æмбырдгонд «Время не вернуть»- æн æмæ Дарчиты Хетæг йæ пьесæ «Адæймаджы» тыххæй. Прозæйы номинацийы архайджытæй иунæг дæр нæ æрæмбырд кодта хъæугæ хъæлæстæ. Тагъд рæстæг лауреатты нæмттæ сфидар кæнынмæ бадæтдзысты республикæйы разамонæгмæ æмæ сын сæ кадджын уавæры ратдзысты дипломтæ æмæ премитæ фæйнæ 50 мин сомы.
