Фыццаджыдæр уал ацыдысты медицинон æркаст
Æдасдзинад – æппæтæй сæйрагдæр. Цæгат Ирыстоны сиддонтæ абалц кодтой Уæрæсейы æфсæддон хæйтты службæ кæнынмæ. Фыццаджыдæр уал ацыдысты медицинон æркаст. Уымæн æмæ пандемияйы рæстæг æдасдзинады мадзæлттæ фæкарздæр сты.
Æфсæддон комиссарады бакуыстой алы хъуыддæгтыл дæр. Лæппутæн барынц сæ тæвд, кæсынц, социалон дистанци куыд æххæст кæнынц, уымæ, стæй алцæмæн дæр кæнынц дезинфекци. Хъæуы бацархайын, цæмæй коронавирус нæ бæстæйы æфсæддон хæйттыл ма апарахат уа, ууыл. Зæгъæн ис, æмæ сиддонтæн сарæзтой цæугæ лаборатори.
Æфсæддон госпиталы медицинон кусджытæ сын сæ анализтæ фехъусын кæнынц 15 минуты фæстæ. Лæппутæй бирæтæ куыд зæгъынц, афтæмæй сæ цы хайадмæ арвитдзысты, уый сын ахсджиагдæр нæу. Сæйрагдæр у æфсæддон уæлæдарæс скæнын, æмæ йын йæ кад хъахъхъæнын. Ацы бон медицинон æркаст ацыдысты 30 лæппуйæ фылдæр. Апарахат сæ кодтой нæ бæстæйы алы хайæдтыл.
Фæлæ сæ фылдæр службæ кæнынмæ баззайдзысты Хуссар æфсæддон зылды. Æфсадмæ сидыны уалдзыгон кампанийы мгъуыдмæ уал нæ республикæйæ службæ кæнынмæ атырныдтой 3 командæйы. Æдæппæтæй та уыдзысты 800 адæймагæй фылдæр. 18 азæй – 27 азы онг кæуыл цæуы, ахæмтæ.
