Иммунизаци уал ацыдысты дыууæ медицинон кусæджы
Цæгат Ирыстоны скодтой фыццаг прививкæтæ коронавирусæй. Иммунизаци уал ацыдысты дыууæ медицинон кусæджы. Уый тыххæй нæ телерадиокомпанийæн фехъусын кодта эпидемиолог Къорнаты Замирæ. Куыд бафиппайдта, афтæмæй прививкæ скодтой æппæт домæнтæ æххæст кæнгæйæ. Иу адæймагæн схызтис йæ буары тæвд, фæлæ ныртæккæ дыууæйæ дæр сæхи æнкъарынц хорз. Уæ зæрдыл уын æрлæууын кæндзыстæм, нæ республикæмæ вакцинæ Спутник В-йы фыццаг парти æрбаластой ивгъуыд къуыри. Æнæниздзинадхъахъхъæнынады министрады куыд фехъусын кодтой, афтæмæй фыццагдæр вакцинæ скæндзысты, коронавирусæй рынчын чи нæ уыд, уыцы дохтыртæн. Иммунизаци цæуы фыццæгæм поликлиникæйы. Уым ис æппæт уавæртæ æмæ гæнæнтæ. Бафиппайын хъæуы уый дæр, æмæ фыццаг парти æппæт республикæйыл нæ аххæсдзæнис. Ведомствойы куыд загътой, афтæмæй тагъд рæстæг регионтæм райдайдзысты æрвитын вакцинæйы егъау партитæ.
