Республикæйы æфсæддон комиссар, мидхъуыддæгты министрад æмæ бынæттон хиуынаффæйады оргæнтæн бабар кодтой, цæмæй Уæллаг Ларсы цæстдарæн пункты равæрой оперативон къорд
Цæгат Ирыстоны скодтой карз цæттæдзинады фæтк. Республикæйы æфсæддон комиссар, мидхъуыддæгты министрад æмæ бынæттон хиуынаффæйады оргæнтæн бабар кодтой, цæмæй Уæллаг Ларсы цæстдарæн пункты æмæ республикæмæ бацæуæнты равæрой оперативон къорд. Йæ уæнгтæ æрсидты гæххæттытæ дæтдзысты, мобилизацимæ чи хауы, уыцы граждæнтæн. Уыимæ уæлдай нæу, гражданин æфсæддон хыгъды цы регионы лæууы, уый. Сергей Меняйло æнæниздзинадхъахъхъæнынады министрадæн бабар кодта, цæмæй машинæтæ æнхъæлмæ кæм кæсынц, уыцы бынаты æдзухдæр рад хæссой тагъд æххуысы машинæтæ. Реданты поселочы та хъуамæ рад хæсса фыдбылызты медицинæйы центры дохтырты къорд.
