Хицæн ныхасы аккаг сты ахуырадон центр «Точка роста»-йы сæрмагонд къæлстæ æмæ робототехникæйы кабинет
Цæгат Ирыстоны скъолатæ сæхи цæттæ кæнынц ног ахуыры азмæ. Джызæлы 2-æгæм скъолайы цалцæггæнæн куыстытæ фесты, æмæ райдыдтой территори æфснайын. Хæстæгдæр рæстæг та дзы райдайдзысты сæрмагонд кусæнгæрзтæ æвæрын. Хицæн ныхасы аккаг сты ахуырадон центр «Точка роста»-йы сæрмагонд къæлстæ æмæ робототехникæйы кабинет. Ацы скъолайы фыццаг хатт райдайдзысты кусын. Цавæр ногдзиндæтæ ма уыдзæн ног ахуыры аз, уый тыххæй радзурдзæн нæ уацхæссæг Бокоты Виктория.
Джызæлы 2-æм скъолайы бæстонæй цæуынц цалцæггæнæн куыстытæ. Сæхи цæттæ кæнынц ног ахуыры азмæ. Скъолайы кусджытæ сæ цæст уæлдай тынгдæр дарынц сæрмагонд кълæстæм. Уым арæзт цæудзысты ахуырадон центр «Точка роста» æмæ робототехникæйы уроктæ. Уыдон ацы скъолайы сæ куыст райдайдзысты фыццаг хатт. Сæ сæйраг нысан у, цæмæй райдиан æмæ астæуккаг скъолайы ахуырдзаутæ арфдæр зоной иумæйаг ахуырадон программæтæ. Уыцы центры сæ зонындзинæдтæ разæнгардæй æххæст кæныныл кусдзысты. Ахуыр кæныны фадат дзы уыдзæн 70-100 проценты онг сывæллæтæн.
Цъыккаты Зæлинæ – Джызæлы 2-æм скъолайы хæрæндоны кусæг: «Ацы кълас цæттæ кæнæм. Йæ плиткæйы аивтой, зæронд пъолтæ йын скалдтой æмæ дзы ног плиткæ сæвæрдтой. Царыл натяжной потолок скодтой, ног, рæсугъд. Освещени дзы скодтой, ток бауагътой.Бирæ розеткæтæ скодтой, именно ацы къласмæ гæсгæ. Дарддæр…Афтæ дзы мæнæ чъырæй дæр сцагътой. Дзæбæх, рæсугъд ай скодтой. Мæнæ ныртæккæ фæвæййæм нæ куыстытæ, æфснайæм, рудзгуытæ æхсæм, пъолтæ æхсæм, æмæ цæттæ кæнæм ацы кълас фыццæгæм сентябрмæ».
Уымæй уæлдай, ног ахуыры аз ацы скъолайы фæзындзæн ноджыдæр ма иу хæрæндон. Уыцы куыст сæххæст кæныныл скъолайы разамынд тынг архайы. Ног чингуытæ æмæ алыхуызон методикон æрмæджытæ æмæ пособитæ æрбаластой кæсæндонмæ дæр. Ныртæккæ балæууыдысты се `фснайыныл.
Хæдзарæггаты Аслан – Джызæлы 2-æм скъолайы директор: «Ног ахуыры аз кълæсыл ис æмæ нæхи цæттæ кæнæм сывæллæтты æрбацыдмæ. Куыд федтат, афтæмæй, бындурон цалцæг скодтам «Точка роста» цы кабинеты уыдзæни, уым. Уæлдай лæмбынæг кæсæм…Бацалцæг се `ппæтт кълæстæ дæр. Иу дзырдæй, стыр æххуыссаг нын сты ахуыргæнджытæ, нæ техникон кусджытæ дæр. Иу дзырдæй, нæхи цæттæ кæнæм сывæллæтты æрбацыдмæ скъоламæ».
Цалцæггæнæн куыстытæ сæ тæмæны бацыдысты Камбилеевкæйы хъæуы фыццæгæм скъолайы дæр. Ам райхæлдтой зæронд спортивон зал æмæ дзы бындурон кустытæм бавнæлдтой.
Зазиты Уырызмæг, Камбилеевскæйы 1-æм скъолайы директоры хæдивæг: «Кусын райдыдтой 10 июны æмæ нырмæ иу бон дæр æнæ рлæугæ алы бон дæр кæнынц кусгæ.Райхæлдтой йæ кæрæй-кæронмæ, кирпиччы онгмæ райхæлдтой. Пъолтæ скалдтой æмæ йæ ногæй аразынц иууылдæр, капитальный ремонт». Мæнæ фестæм, ер ма баззади кустытæ уæртæ батарейтæ сæхгæнын æмæ пъол саразын».
Уæдæ иннæ кълæстæ дæр рохуаты нæ баззадысты. Уым мидæггаг куыстытæ кæронмæ фæхæццæ кæнынц. Пъолтæ ахуырст æрцыдысты, къултæ чъырæй сцагътой. Иннæ мæй та дзы æфснайын райдайдзысты.
Джыккайты Зауырбег, Камбилеевскæйы 1-æм скъолайы директоры хæдивæг, хæдзарадон хайы куыстыты фæдыл: «Скъолайы цæуы капремонт. Къалидортæ ремонт кæнæм, кълæстæ ремонт кæнæм, алы кабинеты ремонт цæуы, штукæтуркæ кæнæм, побелкæ кæнæм, цы хъæуы, уыдон аразæм алы хатт дæр. Фыццæгæм уæладзыгæй цыппæрæммæ иууылдæр капремонт цæуы афтæ».
Горæтгæрон районы скъолаты цалцæггæнæн æмæ арæзтадон куыстытæ кæронмæ æххæст æрцæудзысты августы. Уымæ гæсгæ се ппæт дæр сæ зæрдæ дарынц, сентябры скъоладзаутæ ахуыр кæнын кæй райдайдзысты аив æмæ райдзаст кълæсты, ууыл.
