Бæрæгбоны линейкæтæ ацыдысты республикæйы æппæт ахуыргæнæндæтты дæр
Дидинджытæ, шартæ, цины, уыцы-иу рæстæг та æнкъард æнкъарæнтæ. Æнæ уымæй нæ ацæуы иу фæстаг дзæнгæрæг дæр. Ацы аз азæлыд республикæйы 3 мины 28 рауагъонæн. Чызджытæн æмæ лæппутæн 25-æм май кæд стыр бæрæгбон у, уæддæр дзы бирæтæ сæ цæссыг нæ фæуромынц. Кадджын линейкæтæ бабæрæг кодта не сфæлдыстадн къорд дæр. Бæлвырддæр радзурдзæн Касаты Наирæ.
Цæгат Ирыстоны скъолаты азæлыд фæстаг дзæнгæрæг. Бæрæгбоны линейкæтæ ацыдысты республикæйы æппæт ахуыргæнæндæтты дæр. Традицимæ гæсгæ, фæсивæд кафыдысты скъоладзауты вальс æмæ ирон хореографийы фидауц – симд. Хъуыстысты сæ фыццаг ахуыргæнджыты мысинæгтæ æмæ фыццагкъласонты арфæтæ сæ хистæр хæлæрттæн. 25-æм май у иуæй цины бæрæгбон, иннæмæй та æнкъард. Скъоладзаутæй бирæтæ сæ цæссыг нæ урæдтой. Æмæ сæ бамбарæн дæр ис. Зын сын у сæ уарзон скъолайæ фæхицæн уæвын.
Рауагъдонтæ сæхæдæг куыд зæгъынц, афтæмæй 11 азы атахтысты иу бонау. Абон сын райдайдзысты фæлварæнтæ. Разæй сæм алкæмæ дæр æнхъæлмæ кæсы ног æмæ цымыдисаг цардвæндаг.
Алы къласы разамонæг дæр йæ хъомылгæнинæгтæн скодта цæстуарзон ныстуантæ. Абон ахуыргæнджыты цæсты алы рауагъдон дæр, сæ ас æмæ кар нæ хынцгæйæ, уыди кæддæр скъолайы къæсæрæй чи æрбакъахдзæф кодта, æмæ уæдæй фæстæмæ, иу стыр бинонты уæнг чи сси, уыцы фыццагкъласон.
Сæ рауагъдонтæн фæндараст загътой Дзæуджыхъæуы 38-æм скъолайы дæр. Фæсивæдæн арфæ ракæнынмæ æрбацыди РЦИ-А Парламенты сæрдар Алексей Мачнев. Йæ арфæйы раныхасы загъта, ацы бæрæгбон сæ зæрдыл кæдфæндыдæр дардзысты, æмæ сын уыдзæн царды уæрæх фæндагмæ рацæуыны фыццаг къахдзæф. Дзæнгæрæджы азæлд та царды ног къæпхæнмæ рахизыны символ.
Ахуыры афæдзы кæрон цымыдисаг бæрæгбон рауади Раздзоджы скъолайæн. Ам ис æрмæстдæр иу рауагъдон – Хестанты Алан. Партæйы уæлхъус иунæгæй уыди æнæхъæн афæдз. Урокты æппæт цæстдард лæппумæ. Алан куыд зæгъы, афтæмæй ацы хъуыддаджы хорздзинад дæр уыди. Фæлварæнтæм бацæттæ кодта иттæг хорз. Йæ гыццылæй фæстæмæ йæм уыди бæллиц – дохтыр суæвын. Ныр нысан кæны Цæгат Ирыстоны медицинон академимæ бацæуын.
Ам дæр фæстаг дзæнгæрæг у стыр бæрæгбон. Фарон скъолайы рауагъдонтæ нæ уыди. Ахуыргæнæндоны рагæй дæр ис гыццыл ахуырдзаутæ. Æдæппæтæй 40 скъоладзауы. 5-æм кълас дзы уæвгæ дæр нæй. Æнхъæлмæ кæсынц ног ахуры азмæ дæр. Фыццæгæмкъласонтæ дзы уыдзæни 4.
Ацы аз скъола каст фæуыдзысты 8 мин 9-æм къласоны дæр. Фæстаг дзæнгæрæг азæлыд уыдонæн дæр.
Иннæ азтимæ абаргæй сæ нымæц фылдæр у Дзæуджыхъæуы 50-йæм скъолайы. Уымæ гæсгæ, уыдон зæрдиагæй бацархайдтой сæ хистæр æмкъласонты зæрæдæтæ барухс кæныныл. Бæрæгбоны бацархайдта 70 хистæркъласоны. Рауагъдонтæ сæ кълæсты разамонджытимæ ракодтой кадджын цыд бæрæгбоны фæзмæ. Уым сæм æнхъæлмæ кастысты ныййарджытæ, ахуыргæнджытæ, мадзалмæ хуынд кадджын уазджытæ. Фæстаг дзæнгæрæджы бæрæгбон сарæзтой киноныв исыны хуызы. Рауагъдонтæ рæстæгмæ систы актертæ. Афтæмæй сæ арфæйы ныхæстæ фæхæццæ кодтой сæ кадджын ахуыргæнджытæм. Мадзал рауад хъæздыг кафджытæ æмæ зарджытæй. Кадджын уазджыты номæй та рауагъдонты сæ царды иннæ къæпхæнмæ афæндараст кодта скъолайы раздæры азты рауагъдон Маматы Хъазыбег. Йæ зæрдæ сын загъта, фидæны райдзаст цард. Рауагъдонтæм разæй æнхъæлмæ кæсынц Иумæйаг паддзахадон фæлварæнтæ. Географи, литературæ æмæ химийæ сæ зонындзинæдтæ равдисдзысты абон. Фæстæдæр та абоны бæрæгбоны монцтæ суыдзысты сæ царды райдзаст мысинæгтæ.
