Ныр алкæйы бон дæр у лæвар анализтæ раттын
Цæгат Ирыстоны сног кодтой плæнмæ гæсгæ медицинон æркаст – диспансеризаци. Ныр алкæйы бон дæр у лæвар анализтæ раттын, дохтыры æххуыс райсын. Куыдæй æмæ кæм, уый базыдта не сфæлдыстадон къорд, ныхасы бар Сосранты Жаннæйæн.
Туджы æлхъывдад абарын, зæрдæйы куыст раиртасын, пациенты хъæстытæм байхъусын æмæ сын сæ низ раиртасынæн дарддæр цы кæнгæ у, уый бацамонын. Уый у диспансеризацийы сæйраг хæс. Хъозиты Æхсарбег хъæрзы, æппынæдзух дзæбæхгæнгæ цы низтæ сты, уыдонæй. Уымæ гæсгæ медицинон æркаст кæнын райдыдта æрвылаз. Йæ ныхæстæм гæсгæ ацы мадзалы фæрцы йæ уавæр базоны тагъд, уыимæ лæвар.
Диспансеризаци конд цæуы рагагъоммæ зæрдæйы низтæ, сæкæры диабет, буары æвзæр фæзындтытæ, улæфæнты уавæр сбæрæг кæныны тыххæй. Адæмы бон у райсын эндокринологы, неврологы, кардиологы æмæ гинекологы консультаци райсын.
Дохтыртæ диспансеризаци дих кæнынц дыууæ къæпхæныл. Фыццаг – терапевты æркаст æмæ консультаци. Уыимæ пациенттæн лæвæрд æрцæуы сæрмагонд амындзинæдтæ низ сдзæбæх кæнынæн. Уый фæстæ сбæрæг вæййынц, диспансеризацийы дыккаг къæпхæнмæ цæугæ кæмæн чи у, уыцы пациенттæ. Дохтыртæ адæмæй курæг сты, цæмæй ма зивæг кæной медицинон æркаст цæуынмæ.
Цæгат Ирыстоны адæмы æнцондзинадæн диспансеризацийы куыст сног кодтой. Медицинон æркаст ацæуæн ис, канд поликлиникæты нæ, фæлæ ма хъæутæм ацæуы сæрмагонд мобилон бригадтæ.
Афæдзы бæрæггæнæнтæм гæсгæ фыццаг æркасты фæстæ æппæт пациенттæ дæр дихгонд æцæуынц æртæ къордыл. Иутæ – се нæниздзинад æнæзæрдæхсайгæ кæмæн у, ахæмтæ, иннæтæм хаст цæуынц зæрдæйы æмæ тугдадзинты низтæй чи хъæрзы, уыдон, æртыккаг къорды та ныридæгæн рынчын чи у, уыцы адæм.
18 азæй 39 азы онг кæуыл цæуы, уыцы пациенттæн та дохтыртæ амонынц, цæмæй æлцæмæй æххæст медицинон æркаст аразой æртæ азмæ иу хатт. 40 азæй уæлæмæ кæуыл цæуы, уыдоны та хъæуы диспансеризаци æрвылаз дæр цæуын. Дохтырмæ хи ныффыссæн ис цæрæнбынатмæ хауæг поликлиникæйы, кæнæ Паддзахадон лæггæдты порталы уылты. Закъонмæ гæсгæ кусгæ чи кæны, уыдонæн уыцы бон хъуамæ улæфæн бон уа, йæ мызд ын бафидгæйæ.
