Залмæ раздæхыны фадат сын нæма ис, фæлæ уæддæр æнтыстджынæй архайынц се спортивон цæттæдзинадыл æмæ фæлтæрддзинадыл æфтауыныл
Къæпхæнгай хи изоляцийы фæткæй хизынц Цæгат Ирыстоны спортсментæ дæр. 2 мæйы тренировкæтæ кодтой сæ хæдзæртты, ныр та рацыдысты спортивон фæзтæм. Залмæ раздæхыны фадат сын нæма ис, фæлæ уæддæр æнтыстджынæй архайынц се спортивон цæттæдзинадыл æмæ фæлтæрддзинадыл æфтауыныл.
Ахæм процедурæ дзюдоисттæн иунæг нæу. Уæрæсейы иугонд командæйы уæнгтæ тренировкæтæ кæнынц дыгæйттæй. Се хсæн хъуамæ уа æнæмæнг дистанци 5 метры. Ахæм мадзæлттæ арæзт цæуынц 1-æгæм июнæй фæстæмæ, республикæйы сæргълæууæджы уынаффæмæ гæсгæ. Уый у спортсменты хи изоляцийы фæткæй рацæуыны фыццаг къæпхæн. Сæ тренировкæтæ хъуамæ цæуой уæлдæфы, бæстыхæйтты нæ фæлæ. Цалынмæ дзюдоисттæн татамийыл тренировкæтæ кæныны фадат нæй, уæдмæ се спортивон цæттæдзинадыл æфтауынц спортивон фæзы. Уым сæххæст кæнынц сæрмагонд фæлтæрæнтæ.
Уæвгæ, хи изоляцийы æмгъуыдмæ дæр дзюдоисттæн фæллад уадзыны рæстæг нæ уыди. Фæлтæрæнтæ æххæст кодтой сæ хæдзæртты.
Тренировкæтæ сног сты теннисы Академийы дæр. Æрмæст йæ бацæуæны æнæмæнг процедурæ – буары тæвд сбарын, уымæй дарддæр алы хъазты размæ дæр пуртитæ æмæ ракеткæтæ дезинфекци скæнын.
Цыфæнды хъæбысхæсты хуызы куыд у, афтæ тхеквондойы дæр дистанци дарын зын у. Уымæ гæсгæ уал спортсментæ сæ фæлтæрддзинадыл æфтауынц дардмæ архайгæйæ. Стæй, кæй зæгъын æй хъæуы, æххæст кæнынц æдасдзинады мадзæлттæ.
Физкультурæ æмæ спорты министрады зæгъынц, ныридæгæн карантины уавæртæ кæй æххæст кæнынц кæстæр кары спортсментæ.
Ахæм уавæрты спортсментæ тренировкæтæ кæндзысты 14-æм июны онг.
