Ууыл ныхас цыд, Хицауады сæрдар Дзанайты Барис профилон министртимæ æмæ организациты разамонджытимæ цы æмбырд сарæзта, уым
Цæгат Ирыстоны спорты министрады бæрны цы кусæнуæттæ ис, уыдоны финансон-хæдзарадон ахадгæ архайд фæбæрзонддæр кæнын. Ууыл ныхас цыд, Хицауады сæрдар Дзанайты Барис профилон министртимæ æмæ организациты разамонджытимæ цы æмбырд сарæзта, уым. Премьер куыд загъта, афтæмæй Цæгат Ирыстон у хъæздыг спортивон традицитимæ республикæ, схъомыл кодта бæстæйы æмæ дунейы зындгонд бирæ спортсменты. Республикæйы хицаудзинады оргæнты хæстæй иу у, дарддæр спорты æмæ физкультурæйы райрæзтæн уавæртæ аразын. Профилон министры хæстæ рæстæгмæ æххæстгæнæг Хуадонты Артур фехъусын кодта, ведомствæйы бæрны кæй ис, спортивон цæттæдзинады уæлæмхасæн ахуырадон программæтæм гæсгæ 11 мин адæймагæй фылдæр кæм тренировкæ кæнынц, ахæм 24 кусæнуаты. Дзанайты Барис бахæс кодта организациты финансон-хæдзарадон архайдæн анализ скæнын, куыст фæахадгæдæр кæнын. Афтæмæй республикæйы спортивон куыстнуæтты хатдзæгтæ фæбæрзонддæр уыдзысты.
