Къуссуйæ сын арвыстой хиконд чъиритæ æмæ ахуырст æйчытæ
Æфсæддонтæн лæвар хæххон хъæуæй. Цæгат Ирыстоны цæрджытæ баиу сты, цæмæй сæрмагонд æфсæддон операцийы архайджытæн арвитой куадзæны хай. Къуссуйæ сын арвыстой хиконд чъиритæ æмæ ахуырст æйчытæ. Базарадон – экономикон колледжы студенттæ та скодтой мин адджын гуылы. Бæрæгбоны фынгыл сæйраг бынат ахсынц адджын гуылтæ æмæ ахуырст æйчытæ, фæлæ сæйрагдæр у, уыцы куыст зæрдæйæ кæй кæнынц, уарзондзинад æмæ сын арфæтæ кæй æрвитынц, уый. Хæрзаудæн куыстыты тыххæй бæлвырддæр радзурдзæн Тъехты Элинæ.
Чегаты Регинæ хыссæ кæны чъиритæн. Куыд зæгъы, афтæмæй ацы куыстæн дæр ис йæхи сусæгдзинæдтæ. Хæдзары фсин къæбæр хъуамæ кæна хорз зæрдæйы ахастимæ. Афтæмæй хойраг дæр уыдзæн хæрзаддæр. Ныр Регинæ чъиритæ кæны, цæмæй сæ сæрмагонд æфсæддон операцийы архайджытæн арвита, уый тыххæй.
Æфсæддонтæ алы динтыл хæст кæй сты, уый нæ хынцгæйæ, Регинæйæн ахсджиаг у, цæмæй алы æфсæддон дæр куадзæны ацахода хæдзары конд къæбæрæй.
Чегаты Регинæ: «Уырысы кæнæ æндар ран куы цæрон, уæддæр æй зæрдæйæ зондзынæн, уый мæ Фыдыбæстæ кæй нæу, уый. Кæм райгуырдтæн, кæм сдзырдтон, уый у мæ Фыдыбæстæ. Æппæтæй хуыздæр бынаты куы уон, уæддæр мæн нæ уыдзæн».
Чегаты бинонтæн ис сæхи хъайтар. Чегаты Елмæрза у Фыдыбæстæйы Стыр хæсты ветеран, Ленины æмæ 3-аг къæпхæны орденты кавалер. Хæсты быдыры фæцæф 17 хатты. Фæлæ аирвæзт. Афтæ–иу дзырдта: «Знагимæ хъуамæ хæцай дæ Фыдыбæстæ хъуыды гæнгæйæ».
Чегаты Регинæ: «Мæ фыды фыд архайдта хæсты. Уыд дзы 2 азы æмæ райста уæззау цæфтæ. Йæ иу къух нал куыста. Ссыд ивалидæй. Уыцы хъæбатырдзинадæй дæр æз дæн сæрыстыр».
Куадзæны фынгыл сæйраг бынат ахсынц адджын гуылтæ æмæ ахуырст æйчытæ. Фыцынц сæ хъæдындзы цъæрттимæ. Уыдон дæр – æфсæддонтæн. Уарзондзинадæй уæлдай Чегаты бинонтæ æфсæддонтæн æрвитынц арфæтæ, кувынц Хуыцаумæ.
Уæдæ Гусаты бинонтæ дæр æфсæддонтæн бацæттæ кодтой стыр лæвар – фысы дзидзайы 130 килæйы, адджын гуылтæ, чъиритæ, стæй, кæй зæгъын æй хъæуы, куадзæны символ – ахуырст æйчытæ.
Колледжы ахæм пайдайаг куыст кæнын райдыдтой райсомæй 5 сахатыл. Алкæйы дæр фæндыд йе ххуысы хай бахæссын. Уымæй уæлдай ма æфсæддонтæн бацæттæ кодтой фыццаг æххуысы фæрæзтæ дæр.
Студенттæ æфсæддонтæн бацæттæ кодтой фыстæджытæ æмæ адджинæгтæ. Аласдзысты сæ фонд «Быть добру»-йы ххуысæй. Лæвæрттыл саргъуыдта сауджын Хъуысаты Игорь.
Дзæуджыхъæуыккаг æмæ Алайнаг епархи фронтмæ арвыста фысы дзидзайы 120 килæйы, 300 чъирийы, 100 адджын гуылæй фылдæр, стæй аргъуыд дон. Ахæм хæрзаудæн куысты руаджы æфсæддонтæ сбæрæг кодтой куадзæн æмæ райстой Ирыстонæй салам. Зонынц, æнхъæлмæ сæм кæй кæсæм, уый.
