Кæй фæндыди, уыдон бацархайдтой информацион технологитæ зонынæй æппæтуæрæсеон диктанты
Компьютерон вирустæ, социалон хызтæ, агурæн куыстытæ. Цæгат Ирыстоны цæрджытæн уыд нымæцон къабазы сæ зонындзинæдтæ равдисыны фадат. Кæй фæндыди, уыдон бацархайдтой информацион технологитæ зонынæй æппæтуæрæсеон диктанты. Арæзт фæцæуы алы аз дæр. Æмæ алы хатт дæр Цæгат Ирыстоны паддзахадон университеты математикæйы æмæ компьютерон технологиты факультеты. Диктанты ис 30 фарсты. Сæ зындзинадмæ гæсгæ сты алыхуызон: райдай компьютерон техникæйæ æмæ интернеты тыгъдадæй фæуы. Диктанты фæстæ алкæмæн дæр радтой сæрмагонд сертификат. «IT-диктант» баст уыд программисты бонимæ, æмæ арæзт фæцæуы афæдзы 256-æм бон. Хуымæтæг нымæц нæу. Нысан кæны, 8 разряды кæмæн ис, ахæм байтимæ.