Турнир цæуы 4 къæпхæнæй, фыццаг къæпхæн арæзт æрцыд Кировы районы
Цæгат Ирыстоны цæуынц, республикæйы Сæргълæууæджы Кубок рамбулыны ерыстæ, Сæрмагонд æфсæддон операцийы ветеранты хсæн. Турнир цæуы 4 къæпхæнæй. Фыццаг къæпхæн арæзт æрцыд Кировы районы. Йæ архайджытæ ерыс кодтой спорты 8 хуызæй. Иннæ къæпхæн та уыдзæн июны Беслæны. Уæлахиздзаутæн æмæ призертæн ратдзысты дипломтæ æмæ майдантæ. Фидараты Маринæ радзурдзæн бæлвырддæр.
Сæрмагонд æфсæддон операцийы ветеран Цхуырбаты Зауырбег спортивон ерысты йæ хъарутæ фыццаг хатт нæ фæлвары. Операцийы размæ дæр профессионалон æгъдауæй архайдта армхæсты. Тохы быдыры кæд уæззау цæф фæци, уæддæр йæ ныфс нæ асаст, æмæ ногæй раздæхти стыр спортмæ. Сæрмагонд æфсæддон операцийы ветеранты хсæн республикæйы Сæргълæууæджы Кубок рамбулыны ерыстæ йын хорз фадат радтой йæхи бафæлварынæн.
Зæгъын хъæуы уый, æмæ сæрмагонд æфсæддон операцийы ветеранты хсæн республикæйы Сæргълæууæджы Кубок рамбулыны ерыстæ Цæгат Ирыстоны арæзт æрцыдысты фыццаг хатт. Архайджытæ ерыс кæнынц спорты 8 хуызæй: стъолыл теннисæй, армрестлингæй, шашкæтæй, нардæтæй, æрдынæй æмæ мысан æхсынæй, дартсæй æмæ пауэрлифтингæй. Ахæм мадзæлттæн ис стыр ахадындзинад.
Ерыстæ цæуынц 4 къæпхæнæй. Дыккаг къæпхæн уыдзæн 27-æм июны Беслæны. Турнир саразджыты хъуыдымæ гæсгæ, ахæм ерыстæ канд спортивон уæлахизтæм тырнындзинад не вдисынц, фæлæ ма рагон æрдхæрдтимæ æмæ ног æмбæлттимæ фембæлыны фадат дæр.
Алы къæпхæны уæлахиздзаутæ хорзæхджынгонд цæудзысты дипломтæй æмæ майдантæй. Турнир саразджытæ сты: республикæйы физкультурæйы æмæ спорты министрад, паралимпаг резервы спортивон скъола «Стимул» стæй «Фыдыбæстæ хъахъхъæнджыты» Фонды филиал. Мадзал арæзт æрцыд, паддзахадон программæ «Физкультурæ æмæ спорты рæзт» æххæст кæнгæйæ.
