Специалисттæ зæгъынц, хи изоляцийы фæтк куы сисой, уæддæр туристон бизнес йæ раздæры хъомыс афтæ тагъд нал раздахдзæн
Цæгат Ирыстоны туризмы комитеты сæ зæрдæ дарынц паддзахадон æххуысы уæлæмхасæн мадзæлттыл. Специалисттæ зæгъынц, хи изоляцийы фæтк куы сисой, уæддæр туристон бизнес йæ раздæры хъомыс афтæ тагъд нал раздахдзæн.
Уымæ гæсгæ ахсджиаг у мидтуризмы активон рæзтыл архайын. Хæххон хъуыстгонд дзæбæхгæнæн центртæ кæд фæсарæйнаг туристтæ дæр базыдтой, уæддæр ныртæккæ сты æхгæд. Сæ хицæуттæ та нымайынц, сæвзæрд уавæр сын ци зиан хæссы, уый.
Хъуыстгонд дзæбæхгæнæн центры ныртæккæ уæлдай уынæр нæ фехъусдзынæ. Адæм дзы нæй. Хæрзæрæджы та дзы æмызмæлд кодтой. Центры администраци куыд зæгъынц, афтæмæй сæ проект дыууæ азы дæр нæма кусы, фæлæ уыцы мгъуыдмæ архайдтой сæ комплексæн ном скæныныл. Фыййагдоны дзæбæхгæнæндоны тыххæй базыдтой фæсарæйнаг туристтæ дæр. Ацы сæрд æнхъæлмæ кастысты бирæ уазджытæм. Фæлæ сын пандемийæ сæ нысантæ фехæлдта.
Цалынмæ иутæ сæ фæндтæ ивынц, уæдмæ иннæтæ та сæ зæрдæ дарынц 5-стъалыджын объекты баулæфыныл. Нæ республикæйы цæрджыты ныртæккæ дæр фæнды базонын, Ирыстоны рæсугъддæр æрдзон бынæттæй иуы сæ бон сæ фæллад суадзын уыдзæн, æви нæ, уый. Уыимæ фидарæй зæгъынц, сæ уæттæй æддæмæ дæр нæ цæудзысты, сæйрагдæр сын у уыцы уæлдæфæй улæфын. Фæлæ центры разамынд сæ хъуыды нæ ивынц – адæмы æдасдзинад æппæтæй фыццаг.
Дзæбæхгæнæн центры хицæуттæ хъаст кæнынц, сæвзæрд уавæр сын хæссы зиантæ. Куы гом кодтой, уæд æй æмбæрстой, ахæм æххуыс хонынц даргъ инвестицитæ, уый. Фæлæ сæ хæрдзтæ æхгæныны рæстæг афтæ адæргъвæтин уыдзæн, ууыл хъуыды дæр нæ акодтой.
Цавæр æххуысыл ис зæрдæ дарæн, йæ фæрæзтæ туризмы райрæзтмæ чи бахаста, уыдонæн? Ацы фарст республикæйы туризмы комитетмæ раттынц алы бон дæр.
Туризмы къабазы та сæ зæрдæ дарынц паддзахадон æххуысы уæлæмхасæн мадзæлттыл.
Цыфæнды куы уа, уæддæр специалисттæ зæгъынц, хи изоляцийы фæтк куы сисой, уæддæр туристон бизнес йæ раздæры хъомыс афтæ тагъд нæ раздахдзæн. Ам та зæрдæ дарæн ис æрмæстдæр мидтуризмы активон рæзтыл.
