Шахматтæ, рог атлетикæ, футбол, стъолыл теннис. Цæгат Ирыстоны уыд æппæтуæрæсеон организаци «Фыццæгты змæлд»-ы проект «Вызов первых»-ы регионалон къæпхæн. Спорты алы хуызы дæр сбæрæг кодтой уæлахиздзауты. Фестиваль арæзт цæуы ныр 3-аг аз. Ацы хатт мадзал уыд Цыколайы. Бæлвырддæр радзурдзæн Хъайтмазты Дзерассæ.
Алагиры футболон командæ спортивон мадзалы йæхи æнтыстджынæй равдыста. Цыколамæ æвзонг футболисттæ æрцыдысты фæсивæдон хъуыддæгты фæдыл комитеты хуындмæ гæсгæ. Æмæ нæ фæфæсмон кодтой. Равдыстой сæхи арæхстдзинад, федтой ныхмæлæуджыты фæлтæрддзинад.
Футболæй фæстæмæ ма уыд ерыстæ стъолыл теннисæй, рог атлетикæйæ æмæ шахматтæй. Интеллектуалон ныхмæлæуды уæлахиздзау сси 8-аздзыд Хъозыты Ацæмæз. Шахмæттæй сывæллон архайы 4 азы. Йæ хыгъды ис призон бынæттæ республикон ерысты.
«Фыццæгты змæлды» æппæтуæрæсеон проект «Вызов первых» баст у сабибонты æмæ æвзонгдзинады фестивалы къуыриимæ. Арæзт цæуы 3-аг аз. Мадзаларазджытæ куыд зæгъынц, афтæмæй ахсджиаг у сывæллæтты æмæ фæсивæды æргом спортæй архайынмæ здахын. Уый тыххæй хъæуы æрмæст фæндон.
Турниры сæйраг хæрзиуæг сси – цæугæ кубок. Райста йæ уæлахиздзауты командæ. Ацы ерысты хатдзæгтæм гæсгæ хуыздæртæ систы Мæздæджы районы минæвæрттæ. Уый та нысан кæны, иннæ аз «Вызов первых» сæ районы фæзыл арæзт кæй æрцæудзæн.
