Ацы куыст цæуы Уæрæсейы адæмты æвзæгтæ иртасыны наукон проектмæ гæсгæ
Цæгат Ирыстоны уыд ирон æвзаг ахуыр кæнынæй экспедици. Ацы куыст цæуы Уæрæсейы адæмты æвзæгтæ иртасыны наукон проектмæ гæсгæ. Æххæст æй кæны Михаил Ломоносовы номыл Мæскуыйаг паддзахадон университеты филологон факультет æмæ «Культурон-историон бынтæ хъахъхъæныны» наукон-ахуырадон скъола. Делегацийы хыгъды – куыд фæлтæрдджын ахуыргæнджытæ-филологтæ, афтæ аспиранттæ æмæ студенттæ дæр. Бæлвырддæр радзурдзæн Хъайтмазты Дзерассæ.
Лæмбынæг, бæлвырд æмæ сæйрагдæр стыр цымыдисимæ. Афтæ æрыгон иртасджытæ зонгæ кæнынц ирон æвзагимæ. Ахуыр кæнынц йæ хицæндзинæдтæ – цал диалекты ис, уымæй райдай æмæ грамматикæйæ фæуы. Алцыдæр дзырдуатты æмæ бынæттон æмкусджыты фæрцы. Уыдоны руаджы æвзагимæ зонгæ кæнын æнцондæр у.
Экспедицийы архайдтой Мæскуыйаг паддзахадон университеты ахуыргæнджытæ, аспиранттæ æмæ студенттæ. Бирæтæ сæ республикæмæ фыццаг хатт не *рбацыдысты. Ахæм балцыты сæйрагдæр нысан азæй-азмæ иу у – ноджы хуыздæр базонын ирон æвзаг, æмæ йæ уый фæстæ абарын Уæрæсейы иннæ адæмты æвзæгтимæ.
Экспедицийы куысты хатдзæгтæй фидæны пайда кæндзысты алыхуызон конференцитæм докладтæ кæнæ раззагдæр журналтæн публикацитæ цæттæгæнгæйæ. Æмæ уый ахсджиаг у æрмæст æрыгон ахуыргæндтæн нæ, фæлæ æппæт Ирыстонæн дæр.
Специалисттæ куыд зæгъынц, афтæмæй ацы куыстæн стыр ахадындзинад ис. Æххуыс кæны ирон адæмы культурæ, традицитæ æмæ æвзаг парахат кæныны хъуыддаджы.
