Хицауады Хæдзары йын кусæг фембæлд уыд Цæгат Ирыстоны сæргълæууæг Битарты Вячеславимæ
Цæгат Кавказмæ кусæг балцы рæстæг Францийы æххæстбарджын минæвар Уæрæсейы Сильви Берманн бабæрæг кодта нæ республикæ дæр. Хицауады Хæдзары йын кусæг фембæлд уыд Цæгат Ирыстоны сæргълæууæг Битарты Вячеславимæ. Ныхасы ма архайдтой Францийы минæварады фыццаг Секретарь Николя Брутан, Æфсæддон Атташейы æххуысгæнæг Лорен Дескавь, Уæрæсейы фæсарæйнаг хъуыддæгты минæвар Дзæуджыхъæуы Хетæгкаты Алан æмæ æндæр бæрнон кусджытæ. Францусаг уазджытæн Битарты Вячеслав загъта бузныджы ныхæстæ, 2004-æм азы Беслæны теракты хъыгдард чи баййæфта, уыдонæн зæрдиаг æмæ æнæрынцойæ æххуыс кæй кæнынц, уый тыххæй. Фæстæдæр та фембæлды архайджытæ æрдзырдтой дыууæвæрсыг æмгуыстады фарстатыл. Бæлвырддæр та — инвестицион проекттæ царды уадзыныл, се хсæн — нæ регионы туристон-рекреацион комплексы рæзты фæдыл. Абоны онг Франци у Уæрæсейы ахадгæдæр партнертæй иу. Дыууæ бæстæйы бæттынц экономикон, культурон æмæ гуманитарон бастдзинæдтæ. Зæрдæ дарæн ис фидæны æмгуыстадыл дæр. Нæ республикæйы æнæрынцойæ цæуы инвестицион климат фæхуыздæр кæныны куыст. Зæгъæм, Мамысонгомы фæзы нысан кæнынц, æппæт сезонты чи кусдзæн, ахæм туристон-рекреацион комплекс саразын. Уый тынг ахсджиаг у нæ регионæн, загъта Битарты Вячеслав. Сильви Берманн дæр раарфæ кодта республикæйы разамонæгæн, æмæ радзырдта фидæны æмгуыстады нысанты тыххæй. Бæрнон кусджытæ ма æрныхас кодтой, Цæгат Ирыстоны национ проекттæ куыд æххæстгонд цæуынц, ууыл. Уæ зæрдыл уын æрлæууын кæндзыстæм, нæ республикæ архайы 50 федералон проекты. Æдæппæтæй та сты 67. Федералон центры æххуысы фæрцы регионы арæзт цæуынц бирæ социалон объекттæ: скъолатæ, рæвдауæндæттæ, æнæиздзинадхъахъхъæнынады, культурæйы æмæ спорты куыстуæттæ.
