Сæ дæсныйад дзы æдисынц 140 æрыгон чызджы æмæ лæппуйы
Цæгат Кавказы аграрон технологон колледжы цæуы Æппæтуæрæсеон чемпионат «Профессионалтæ». Сæ дæсныйад дзы æдисынц 140 æрыгон чызджы æмæ лæппуйы. Ерыстæ Цæгат Ирыстоны арæзт æрцыдысты 3-аг хатт. Нæ республикæйы кад дзы хъахъхъæнынц 13 адæймаджы.
Чемпионат «Профессионалы» -йы регионалон къæпхæны уæлахиздзау Георгий Ратанов Цæгат Ирыстонмæ ссыд фыццаг хатт. Дæллаг Новгороды областы горæт Перевозы арæзтадон колледжы студент йæ арæхстдзинад æвдисдзæн агуыридурæй амайынæй. Георгий у ерысты 140 архайæгæй иу. Уыдонæн чемпионат фадат дæтты сæ фидæны дæсныйадимæ хæстæгдæр базонгæ уæвынæн.
Студентты æмрæнхъ сæ профессионалон зонындзинæдтæ æвдисынц скъоладзаутæ дæр. 56 регионы минæвæрттæ архайынц 5 дæсныйады: чъиритæ кæнынæй, адджинæгтæ фыцынæй, агуыридурæй амайынæй, фермерон æмæ хъæдæрмæгимæ куыстыты. Скъоладзау Джыккайты Камилæ йæ арæхстдзинад æвдисдзæн чъиритæ кæнынæй.
Чемпионат Цæгат Ирыстоны арæзт æрцыд 3-аг хатт. Ацы аз нæ республикæйы кад хъахъхъæнынц 13 адæймаджы. Цæгат Ирыстон у, хатдзæгтæгæнæн къæпхæн кæм ацыд, бæстæйы ахæм 29 регионæй иу. Экспертты *хсæн æрмæст хъомылгæнджытæ не сты, фæлæ куысты бынæттæ аразджытæ дæр. Уыдон ерысгæнджытæн æвæрынц бæрæггæнæнтæ, стæй кæнынц хатдзæгтæ, фæзты цы куыстытæ цæуынц, уыдонæн.
Ерыстæ саразджыты хъуыдымæ гæсгæ, чемпионат хорз мадзал у кусæг дæсныйæдты кад фæбæрзонддæр кæнынæн. Фæз, традицимæ гæсгæ, Цæгат Кавказы аграрон технологон колледж радих кæны.
Чемпионат фæуыдзæн 30 апрелы. Уæд фехъусын кæндзысты уæлахиздзауты – сæ дæсныйæдты хуыздæрты нæмттæ.
