Кусдзысты дзы арæзтадон отрядты хыгъды
Цæгат Кавказы хæххон-металлургон институты æмæ профилон техникумты студенттæ цæттæ кæнынц Норильскмæ ацæуынмæ. Кусдзысты дзы арæзтадон отрядты хыгъды. Фæсивæдæн уый у хорз фадат, фæлтæрддзинад райсынæн æмæ сæхи равдисынæн. Ацы аз республикæйæ ацæудзæн æппæтæй стырдæр къорд – 500 адæймагæй фылдæр. Семæ фембæлд не сфæлдыстадон къорд. Хъайтмазты Дзерассæ радзурдзæн бæстондæр.
Хъæддæснытæ, бетонгæнджытæ, слесыртæ. Цæгат Кавказы хæххон-металлургон институты архитектурон-арæзтадон факультеты студенттæ, стæй профилон техникумты ахуырдзаутæ цæттæ кæнынц Норильскы практикæ ацæуынмæ. Козаты Павел ахæм балцы фыццаг хатт нæ цæуы. Фарон лæппу уыд Норильскы арæзтадон отряды хыгъды. Уæд кодта хæдзары сæрæмбæрзæн куыстытæ. Ацы аз дæр та Павелы бафæндыд йæ фæлтæрддзинад фæфылдæр кæнын. Йæ ныхæстæм гæсгæ, хæлæрттимæ иу къорды кусын æнцондæр у.
Гойаты Зазæ та ацы аз фыццаг хатт уыдзæн Норильскы. Фæнды йæ йæ зонындзинæдтæй практикæйы спайда кæнын. Куыд зæгъы, афтæмæй ахæм стыр заводы коллективимæ бакусын æрмæст бæрнон нæу, фæлæ ма пайда у фæлтæрддзинад райсынæн.
Практикæйы студенттæ бамбардзысты, фидæны сæ дæсныйадмæ гæсгæ сæ бон кусын суыдзæн æви нæ, уый. Дзобайты Зауырбег дæр кæддæр куыста арæзтадон отряды. Практикæйы фæстæ баззад Цæгаты. Ныр у компани «Норильскникель ремонт»-ы разамонæджы хæдивæг. Йæ ныхæстæм гæсгæ, Цæгат Ирыстоны фæсивæд йæхи хорз равдисы заводы.
Фæндаггаг, цæрæн æмæ хæрынæн хæрдзтæ йæхимæ райста «Норникель». Ацы аз фыццаг хатт арæзтадон отрядты хыгъды сты аграрон университеты, электроникæйы, арæзтадон æмæ æфсæнвæндаджы колледжты студенттæ.
Республикæйы арæзтадон отрядтæ æрвитын – рагон традици у. Фыццæгты арвыстой ивгъуыд æнусы 50-йæм азты. Ацы аз Цæгат Ирыстонæй ацæудзæн 502 адæймаджы. Ныры онг ахæм стыр къорд нæма уыд. Кусынмæ ма æрвыст æрцæудзæн цалдæр отряды бæстæйы алы регионтæй. Уыдоны хсæн дæр цæгатирыстойнаг къорд у се ппæтæй стырдæр.
