Мадзал баст уыд Джеоргуыбайы къуыриимæ
Цæгат Кавказы хæххон-металлургон институты уыд ирон бæгæныйы традицион фестиваль. Мадзал баст уыд Джеоргуыбайы къуыриимæ. Студенттæ-технологтæ ерыс кодтой сæ арæхстдзинады. Сæ авторон рецепттæ фæстæдæр суыдзысты дипломон куыстыты хай. Архайджытæн аргъ кодтой æцæг профессионалтæ – Ирыстоны бæгæныфыцæн хæдзæртты эскперттæ. Бæлвырддæр радзурдзæн Хъайтмазты Дзерассæ.
Фæстаг цæттæгæнæн мадзæлттæ дегустацийы размæ. Фидæны аразæг Байаты Артур бæгæныфыцæгæй йæхи фыццаг хатт бафæлвæрдта. Йæ рецепты бындуры сты бинонты традицитæ. Конкурсмæ фыццагкурсон лæмбынæг цæттæ кодта, уымæн æмæ æрмæст йæхи не *вдыста, фæлæ йæ факультет дæр.
Металлургты командæ жюрийы дисы бафтыдта сæрмагонд хъацæнæй. Атайты Давидæн æй бацамыдтой йæ хæстæджытæ. Бинонты сусæгдзинад дыккагкурсон нæ раргом кодта, фæлæ иумæйаг рецепт радзурын йæ бон у. Йæ нозт рауадис урсгонд. Ахæм уыд йæ нысан.
Цæгат Кавказы хæххон-металлургон институты ирон бæгæныйы конкурс-фестиваль фæцæуы æрвылаз. Традицимæ гæсгæ вæййы Джеоргуыбайы къуырийы. Архайджытæ вæййынц æрмæст ахуыргæнæндоны студенттæ. Уæлахиздзаутæн радтынц æхцайы призтæ æмæ институты хуыздæр бæгæныфыцæджы ном.
Ацы аз конкурсы уыд бæгæныйы 20 хуызы. Профессионалон жюрийы хъуыд алы нозтæн дæр дегустаци скæнын. Алы бæгæныйы хуызæн дæр уыд йæхи номер, уыимæ рецептты автортæ бæрæг нæ уыдысты.
Жюрийы уæнгтæй фæстæмæ ма конкурсанттæн аргъ кодтой адæм дæр. Нозтытæ ацаходын уыд алкæйы бон дæр. Уый фæстæ хъуыд сæвæрын баллтæ дегустацион картæйы. Аргъ кодтой æрмæст бæгæныйæн нæ, фæлæ ма архайджытæ цы хойрæгтæ бацæттæ кодтой, уыдонæн дæр.
