Уым рамбылдтой 9 майданы
Цæгатирыстойнаг æрыгон фигуристкæтæ сæхи æнтысджынæй равдыстой ерысты Армавиры. Уым рамбылдтой 9 майданы. Уыцы сгуыхтдзинад у сæ куыстуарзондзинады ирд æвдисæн. Чызджыты бацæттæ кодтой фæлтæрдджын тренертæ Козаты Алинæ æмæ Торчынты Аланæ. Бæлвырддæр хабæрттæ радзурдзæн Чехойты Фатимæ.
5-аздзыд Таучелаты Елизаветæ спорты стыр дунемæ фæндагыл нырма ныр æрлæууыд. Йæ фыццаг къахдзæфтæ рауадысты æнтыстджын. Чызгæн йæ дебютон ерыстæ Армавиры уыдысты ахадгæ – рамбылдта дзы æвзист майдан. Йæ программæ уыд алывæрсыг. Йæ дæсныйадæн, цырддзинадæн æмæ ирд хореографийæн аккаг аргъ скодтой жюрийы уæнгтæ.
Армавиры ерысты цæгатирыстойнаг фигуристкæтæ рамбылдтой 9 хæрзиуæджы. Æвзист майданы хицау сси Елбийты София дæр. Уый 7 азы цæуы секцимæ. Ис æм 3-аг спортивон разряд. Рæсугъд æмæ уыцы-иу рæстæг зын спорты хуыз домы бирæ тыхтæ. Æнтыстджын тренировкæты иу хаттæй иннæмæ фæбæрзонддæр вæййы чызджыты цæттæдзинад. Софияйы ныхæстæм гæсгæ йын, ихы цæхæр тавы йæ зæрдæ.
Чызджыты арæхстдзинад у тренертæ Козаты Алинæ æмæ Торчынты Аланæйы куысты хатдзæг. Козаты Алинæ йæ цардæй 15 азы снывонд кодта спорты ацы хуызæн. 5 азы размæ сси тренер. Алы чызгимæ дæр хицæнæй кæй кусы, уый нымайы се *нтыстдзинады сусæгдзинадыл.
Ныр чызджытæ сæхи цæттæ кæнын райдыдтой радон ерыстæм. Мæйы кæрон архайдзысты чемпионаты Ессентукийы.
