Бинонтæм æнхъæлмæ кæсынц Мæскуыйы реабилитацион центры
Цæллаты Давиды та ногæй хъæуы æххуыс. 4 азы размæ йыл æрцыд бæллæх. Æрхаудис ыл бæлас. Лæппу уæззау цæфтæ фæцис. 13-аздзыд Давиды хъæуы æрвылазон реабилитаци. Цалдæр дзæбæхгæнæн курсы ацыд, æмæ ис æнтыстдзинæдтæ. Ныр дæр бинонтæм æнхъæлмæ кæсынц Мæскуыйы реабилитацион центры. Фæлæ специалистты æххуыс райсынæн хъæуы фæрæзтæ 1 милуан 800 мин сомы. Бæлвырддæр радзурдзæн Хъайтмазты Дзерассæ.
Сæрыл хæцын сахуыр уæвын – Цæллаты Давидæн уый стыр æнтыстдзинад у йæ уавæры. Вандæ æрвылбон 2 сахаты æмæ *рдæг йемæ архайы дзæбæхгæнæн физкультурæйæ.
4 азы размæ 9-аздзыд Давидыл æрцыд бæллæх – скверы йыл бæлас æрхаудис. Сæры магъзы уæззау цæф, клиникон мæлæт. Дохтыртæ ницавæр хорз бæрæггæнæнтæй зæрдæ æвæрдтой. Фæлæ лæппу йæхимæ æрцыд, телефонæй йæ фыды хъæлæс куы фехъуыста, уæд. Уыцы бонæй райдыдта ныййарджыты æрвылбон тох сæ хъæбулы уавæрыл.
Фыццаг æнтыстдзинад уыд, дохтыртæ Давидæн трахеостомæ куы систой æмæ лæппу йæхæдæг улæфын кæй райдыдта, уый. Реабилитацион центр «Три сестры»-йы Давиды хорз зонынц. Ам сахуыр сæрыл хæцын. Фæстаг æнтыстдзинæдтæй иу у, реабилитологы хæслæвæрдмæ гæсгæ лæппу йæ къæхтæ змæлын кæнын кæй райдыдта, уый.
Ныййарджытæ æппæт хъарутæй архайынц сывæллоны сдзæбæх кæныныл. Фæлæ æнæ специалистты æххуысæй уый къухы нæ бафтдзæн. Сæрды райдиан та бинонты ногæй хъæуы реабилитацион центрмæ. Æнхъæлмæ сæм кæсынц 4-æм июны.
Реабилитацийы 2 курсæн хъæуы 1 милуан 806 мин сомы. Ахæм фæрæзтæ бинонтæм нæй. Цæллаты фарсмæ æдзух сты хæрзаудæн фонд «Быть добру» æмæ зæрдæхæлар адæм. Ныртæккæ та сæ ногæй хъæуы æххуыс. Нысангонд рæстæгмæ бирæ нал ис. Фæрæзтæ арвитын ис, экраныл цы реквизиттæ ис, уырдæм.
Давид йæ мидбылты худы, тренировкæтæй куы бафæллайы, уæд æлхынцъæрфыгæй фæкæсы, æмæ æрвылбон тох кæны, цæмæй уыцы æвирхъау цауы размæ йын цавæр цард уыд, уымæ раздæха. Уымæн та йæ хъæуы не ппæты иумæйаг æххуыс.
