Куыстытæ дзы æххæстгонд æрцыдысты, национ проект «Æнæниздзинадхъахъхъæнынад»-мæ гæсгæ
Алагиры районы Цæлыккаты хъæуы реконструкцийы фæстæ байгом фельдшерон-акушерон пункт. Куыстытæ дзы æххæстгонд æрцыдысты, национ проект «Æнæниздзинадхъахъхъæнынад»-мæ гæсгæ. Специалисттæ баивтой коммуникацитæ, пъолтæ, сфидар кодтой бындур, базылдысты алфамбылай территоримæ дæр. Бæлвырддæр радзурдзæн Хъайтмазты Дзерассæ.
Йæ байгом кæныны кадджын мадзалы фæстæ, фельдшерон-акушерон пункт уайтагъд райдыдта йæ куыст. Райдзаст хъарм кабинеттæ, компьютертæ æмæ хъæугæ ифтонггæрзтæ. Егъау рацарæзт сæххæст кодтой 8 мæймæ.
Дохтыры, процедурæтæгæнæн, æркасты кабинеттæ. Æнæниздзинадхъахъхъæнынады министр Тебиаты Сослан федта, фельдшерон-акушерон пункты бæстыхай куыд сцалцæг кодтой, уый. Куыстытæ æххæстгонд æрцыдысты национ проект «Æнæниздзинадхъахъхъæнынад»-мæ гæсгæ.
Куыстытæ райдыдтой майы. Фыццаг фæнд кодтой хуымæтæг цалцæг скæнын. Фæлæ кусгæйæ рахастой, объектмæ бындуронæй базилыны уынаффæ. Подрядон организацийы разамонæджы ныхæстæм гæсгæ, бæстыхай нырма рацарæзты заманы арæзт уыд къуылымпытимæ. Специалисттæ баивтой коммуникацитæ, сфидар кодтой бындур.
Хъæуы алы уынгтæй дон бæстыхайы раз æмбырд кодта. Аразджытæн сæ бон æххæстæй кусын нæ уыд. Специалисттæ скодтой дренаж, базылдысты территоримæ. Ацы куыстытæ сæхи хардзæй сæххæст кодтой. Агъуыстыты бæрзонд уымæлад æмæ хъуына кæй уыд, уымæ гæсгæ дзы уæвын æдас нæ уыд. Цгъойты Зитæ у ФАП-ы сæргълæууæг. Кусы 12 азы. Куыд зæгъы, афтæмæй-иу раздæр йæ кусæн бон æркастæй нæ райдыдта, фæлæ къултæ хъуынайæ сыгъдæг кæнынæй. Ныр йæ пациенттæм æнхъæлмæ кæсы райдзаст агъуысты. Хъæуы цæры 300 адæймагæй фылдæр. Медицинон æххуысмæ фылдæр æрбацæуынц хистæр кары адæм. Бирæтæ зæрдæйы æмæ сæкæрнизимæ. Фельдшерæн йæ бон у æркæсын æнхъæлцау сылгоймæгтæм æмæ сывæллæттæм дæр.
Цгъойты Зитæ, ФАП-ы сæргълæууæг: «Нæ ФАП нын тынг дзæбæх скодтой. Нæ зæрдæ дзы райы. Алцыдæр дзы ис». + «Куыд хистæр кары адæм, афтæ нæм æрбацæуынц гыццыл сывæллæттæ дæр сæ ныййарджытимæ, ноггуырдтæ. Алцыдæр сын кæнæм, барæм сæ алы мæй дæр. Кæцы специалист сæ фæхъæуы, уымæ дæр сæ арвитæм».
2022-æм азы нацпроект «Æнæниздзинадхъахъхъæнынад»-мæ бахауд 5 проекты. Хæстæгдæр рæстæг байгом уыдзæн амбулатори станицæ ЛУковскæйы, Кировы районы та бындурон цалцæджы фæстæ йæ дуæрттæ байгом кæндзæн поликлиникæ, стæй ма цалдæр объекты Æрыдоны районы æмæ Алагиры.
